O patinador Javier Fernández, a saltadora de altura Ruth Beitia, a tenista Garbiñe Muguruza e o futbolista Andrés Iniesta foron galardoados este luns cos Premios Nacionais do Deporte 2015, que convoca o Consello Superior de Deportes.
Javier Fernández, que en 2015 gañou o primeiro dos seus dous títulos Mundiais de patinaxe artística, recibirá o Premio Rei Felipe como deportista masculino máis destacado.
O Premio Reina Letizia, á mellor deportista feminina, será para Ruth Beitia, este ano campioa olímpica de salto de altura en Río e que en 2015 foi bronce mundial en Moscova.
O Premio Rei Juan Carlos á deportista revelación é para a tenista Garbiñe Muguruza, finalista de Wimbledon en 2015 (e que neste 2016 gañou Roland Garros), mentres que o Premio Reina Sofía, que distingue o xogo limpo, é para o internacional do FC Barcelona Andrés Iniesta.
O arxentino Jorge Sampaoli, adestrador do Sevilla FC e que en 2015 conduciu á selección chilena de fútbol a gañar a súa primeira Copa América, recibirá o Trofeo Comunidade Iberoamericana.
O taekwondista Jesús Tortosa, Premio Infanta Leonor ao deportista menor de 18 anos con mellor progresión; o presidente do comité paralímpico español Miguel Carballeda, Premio Infanta Sofía polo fomento do deporte entre os discapacitados; a selección masculina de baloncesto, campioa de Europa en 2015, Copa Barón de Güell ao mellor equipo; e LaLiga4Sports, Copa Stadium á entidade destacada pola súa contribución ao fomento do deporte, tamén figuran entre os premiados.
Completan a relación o Concello de León, Premio Consello Superior de Deportes; o Colexio Basee, Trofeo Joaquín Blume; o INEF de Madrid polo seu 50 aniversario, Premio Nacional ás Artes e as Ciencias Aplicadas ao Deporte; e Pedro Ferrándiz, Premio Francisco Fernández Ochoa a unha vida entregada ao deporte.
O xurado estivo presidido polo director xeral de Deportes, Óscar Graefenhain. Os premios entregaranse nunha data aínda por decidir.
