Gómez Noya queda segundo en Cidade do Cabo e lidera o Mundial

O inglés Alistair Brownlee, campión olímpico en Londres 2012, gañou a cuarta proba do Mundial de tríatlon, disputada na localidade surafricana de Cidade do Cabo, onde o español Javier Gómez Noya -prata nesa cita olímpica e catro veces campión do mundo- quedou segundo e tomou o liderado. Brownlee, que disputaba a súa primeira proba da tempada no Mundial, logrou a súa décimo oitava vitoria nunha proba das World Series ao cubrir o percorrido, de 750 metros a nado (segmento que se rebaixou na metade do previsto, debido ao mal tempo) corenta quilómetros en bicicleta e dez máis de carreira a pé, nun tempo dunha hora, 39 minutos e vinte segundos.

O campión olímpico de Leeds, que baseou o seu triunfo na carreira a pé, onde se fixo a selección definitiva, gañou con cinco segundos de vantaxe sobre Gómez Noya, que co segundo posto deste domingo desbancou do liderado do Mundial a Jonathan Brownlee, -irmán menor de Alistair e bronce olímpico-, que gañara en Auckland (Nova Zelandia) e en Gold Coast (Australia), pero que este domingo non competiu en Cidade do Cabo.

En terceira posición, a oito segundos de Alistair, clasificouse o francés Vincent Luis, nunha proba na que volveu brillar o tríatlon español: o toledano Fernando Alarza foi quinto -por detrás do surafricano Richard Murray, cuarto ante o seu público-, a 32 segundos de Brownlee; mentres que o balear Mario Mola, gañador da proba sprint de Abu Dhabi que abriu o campionato, foi oitavo, a 57 segundos do gañador. O mexicano Crisanto Grajales mantivo a súa boa serie e volveu asinar un top ten, ao acabar noveno, a un minuto e dez segundos de Brownlee.