Javier Gómez Noya finalizou cuarto no Tríatlon de Yokohama, terceira proba das series mundiais, mentres que Fernando Alarza foi sexto e colócase segundo na clasificación do mundial. Igual que na proba anterior, en Bermuda, o segmento inicial de natación resultou decisivo polas grandes diferenzas que se produciron e que logo foron complicadas de recuperar.
Gómez Noya desde o primeiro momento estivo na cabeza e loitou polos primeiros postos ata o final dunha proba que se adxudicou o francés Vincent Luís, cun tempo de 1h.43.21, co surafricano Henri Schoeman a 3 segundos e o húngaro Bence Bicsak a 5 e o campión español a 16 segundos.
Nun segundo grupo estiveron Fernando Alarza, Vicente Hernández e Antonio Serrat. Alarza acabou na sexta posición, a 45 segundos do vencedor, e colócase en segundo lugar na clasificación xeral. Hernández entrou no posto 17 a 1.31 minutos e Serrat, no 27 a 2.59 minutos. Mario Mola, actual campión do mundo, foi o 29 a 3.04 minutos, tras perder máis dun minuto no segmento acuático que logo non puido recuperar.
En categoría feminina dominaron as estadounidenses Katie Zaferes (1h.52.12), Summer Rappaport (a 20 segundos) e Taylor Spivey (a 1.16 minutos). A estremeña Miriam Casillas entrou no posto 17 a 4.30 minutos e a catalá Carolina Routier entrou no posto 35 a 9.07 minutos.
En paratriatlón, os españois lograron dúas medallas de ouro na categoría PTVI grazas a Susana Rodríguez (e o seu guía Paula Godino) e José Luís García (xunto a Ángel Salamanca) e unha de bronce de Kini Carrasco nas categorías PTS3. Rakel Mateo foi cuarta na clase PTS2 e Eva Moral quinta en PTWC.
