Un futbolista do Dépor e o galego Borja Fernández, entre os detidos por unha rede de amaños

A Policía Nacional iniciou na mañá deste martes unha operación contra o presunto amaño de partidos de fútbol en Primeira e Segunda División, na que xa foron detidos varios futbolistas.

Segundo informa Servimedia, entre os apresados por esta trama, que se dedicaría a obter beneficios a través de apostas deportivas, atópanse Íñigo López, actual xogador do RC Deportivo, o galego Borja Fernández, recentemente retirado como xogador en activo tras xogar as dúas últimas tempadas no Real Valladolid, o exmadridista Raúl Bravo, ao que sinalan como presunto xefe da trama, Samu Saiz (Xetafe CF) e Carlos Aranda, que militou nas filas de preto dunha decena de equipos de Primeira.

Ademais, na operación tamén foron detidos o presidente da SD Huesca, Agustín Lasaosa, e o xefe dos servizos médicos deste mesmo club, Juan Carlos Galindo Lanuza, nunha mañá na que se despregou un amplo dispositivo policial na sede do equipo oscense.

A todos eles acúsaselles de pertenza a organización criminal, corrupción entre particulares e branqueo de capitais.

Fontes policiais aseguran que se prevé a detención dun total de once persoas en varias provincias españolas.

DENUNCIA DE LALIGA. Hai un ano, LaLiga apuntou ás "cotizacións alarmantes" nas casas de apostas durante o partido de fútbol entre Huesca e Nàstic (0-1) de Segunda División.

Ata 30 casas de apostas suspenderon entón as cotizacións para este encontro tras detectar entradas de diñeiro anormais para o empate sen goles ao descanso e a vitoria visitante final. A RFEF abriu expediente a Huesca e Nàstic pola alerta de amaño.

Fontes de LaLiga consultadas por Europa Press confirmaron que desde este estamento do fútbol presentouse unha denuncia por mor das sospeitas deste partido, disputado do 27 de maio de 2018. Nesa mesma tempada 2018-2019 realizáronse, ademais, outras oito denuncias relacionadas con supostos amaños no fútbol a través das casas de apostas.

Tamén sinalan que a vixilancia se reforzou a través dun protocolo coa Policía Nacional asinado en marzo de 2017. 

DECLARACIÓN ANTE O XUÍZ. Segundo informa o Tribunal Superior de Xustiza de Aragón, os seis detidos declararán ante o xuíz

Ademais das persoas xa detidas o xulgado investiga tamén a outras 15 persoas máis relacionadas co mundo do fútbol e as apostas deportivas e unha personalidade xurídica, o Club de Fútbol Sociedade Deportiva Huesca. O maxistrado declarou o segredo de actuacións na causa.