Froome marca o tempo do seu cuarto Tour de Francia en Marsella

O británico Chris Froome (Sky) é o virtual vencedor do Tour de Francia tras o seu terceiro posto na decisiva crono de 23 quilómetros disputada en Marsella, na que se impuxo o polaco Maciej Bodnar (Bora), o colombiano Rigoberto Urán quitou o segundo posto ao francés Bardet e o español Mikel Landa quedou a un segundo do podio.

Quedou resolto o Tour en favor de Chris Froome, de 32 anos, quen arriscou o xusto para ser terceiro na loita contra o reloxo, por detrás dos polacos Maciej Bodnar, vencedor, e Michal Kwiatkowski, o seu compañeiro do Sky.

Non houbo cor na loita pola camisola amarela, Froome arriscou o xusto para conseguir o obxectivo. Tampouco na pelexa polo segundo chanzo, pois Urán merendou a Bardet de principio a fin, superando ao ídolo francés en 1.30 minutos. O de Urrao (Antioquía), de 30 anos, é o segundo corredor despois de Nairo Quintana que sobe ao segundo chanzo do Tour.

A máxima emoción protagonizouna Mikel Landa. O alavés atopábase a 1.13 de Bardet e desde o inicio foille limando tempo. O podio achegábase a pasos axigantados, acariñouno o de Murgia, pero ao final o soño morreu a un só segundo do máximo obxectivo.

Landa lamentou os segundos perdidos nalgunhas etapas na que puido sacar unha rendibilidade que agora lamenta. "É unha mágoa despois de tantos quilómetros. Faltoume experiencia. Ógallá volva ter outra oportunidade como xefe de filas dun equipo. Estou contento co triunfo de Froome, síntome en parte gañador, pero non me vou cheo do todo", dixo na meta.

Alberto Contador, noutra das loitas pendentes na crono, fixo un meritorio sexto posto a 21 segundos do gañador. O de Pinto terminará noveno, desprazando ao francés e rei da montaña Warren Barguil, décimo. Lonxe dos seus obxectivos, máis lonxe que nunca, pero reconfortado "coa ovación do público" no "velódromo de Marsella".

Froome gañará o seu cuarto Tour sen levar un triunfo de etapa, o que non ocorría desde 2006 con Óscar Pereiro ou desde 1990 co estadounidense Greg Lemond. "Para min non é ningunha frustración. O Tour é o Tour, son tres semanas e o importante é ser líder ao final", dixo. Acompañarano no podio de París Rigoberto Urán, a 54 segundos, e Bardet a 2.20, unha decepción para a afección francesa, que non encheu o Velódromo ante a chamada do Tour.

Unha crono con pompa e boato que saía e entraba no escenario futbolístico do Velódromo de Marsella, estadio do Olympique. Un circuíto para especialistas, polo centro da cidade, Porto Vello e ascenso a Notre Dame de la Garde, a igrexa que domina desde a altura a segunda cidade de Francia. Un bo repeito de 1,2 quilómetros ao 9,5 por cento de pendente a 7 quilómetros do final.

Proba para especialistas, capaces de mover desenvolvemento. A primeira referencia de interese marcouna en meta o polaco Maciej Bodnar (28.15 minutos), marca non superada polo tetracampeón mundial alemán Tony Martin nin polo suízo Stefan Kung, do lote de favoritos á vitoria de etapa. Non entrou na pomada o campión de España Jonathan Castroviejo (Movistar), quen non se decatou dunha zona de cemento que lle provocou unha caída á saída do estadio. Pronto quedou eliminado o biscaíño, quen gardara forzas os últimos días para disputar a crono marsellesa.

Non eran as cinco da tarde cando empezaron a saír os pesos pesados. Rapidamente o guión sinalaba a Froome para gardar a camisola amarela sen problema, xa que Bardet afundíase e Urán non limaba tempo nos pasos intermedios. Non había por que arriscar máis da conta. Urán a punto estivo de caer na última curva, e Froome levaba a información precisa para chegar a meta ao seu ritmo, cos rivais xa despexados. Só sufriron Bardet pola dura derrota e Landa, por un suspiro. Xeitos de perder.

Este domingo fin de festa do Tour 2017 coa disputa da vixésima primeira e última etapa, un paseo triunfal de homenaxe ao gañador de 103 quilómetros entre Montgeron e París.