O fiscal rebaixou no xuízo a dous anos e medio a petición inicial de cinco anos de cárcere para o exfutbolista Xabi Alonso por defraudar supostamente a Facenda dous millóns de euros durante os exercicios de 2010, 2011 e 2012, anos nos que era xogador do Real Madrid.
A Audiencia Provincial de Madrid deixou este xoves visto para sentenza o xuízo a Xabi Alonso, ao seu asesor fiscal, o avogado Iván Zaldúa, e a Ignasi Maestre, o entón administrador dunha sociedade radicada en Madeira (Portugal), á que o primeiro cedeu os seus dereitos de imaxe en 2009 cando estando no Liverpool recibiu a oferta para fichar polo Real Madrid.
Para cada un deles o fiscal rebaixou a dous anos e medio a súa petición de prisión por tres delitos contra a Facenda Pública ao aplicar a circunstancia atenuante de reparación do dano ao pagar a cota supostamente defraudada máis os intereses antes de que fosen requiridos tras a reapertura desta causa, que no seu día fora arquivada.
O exxogador, campión do mundo coa selección española en 2010, afirmou que "Facenda fai o seu traballo" e que non se sente "perseguido": "Está a ser un proceso longo, e iso cansa, pero a pesar da duración, teño confianza na absolución", afirmou.
"Non me interesa sentar precedentes, cada caso é moi diferente", aclarou. O seu único obxectivo é "demostrar que se fixo todo en amparo da lei" e que cumpriu" con todas as súas obrigacións.