Hacienda considera que Cristiano Ronaldo defraudou 15 millóns

A sección de delitos económicos da Fiscalía Provincial de Madrid investiga se hai delito fiscal na denuncia da Axencia Tributaria contra o xogador do Real Madrid Cristiano Ronaldo por presuntamente defraudar 15 millóns de euros en catro anos, desde 2011 a 2014.

A denuncia está xa en mans dos fiscais especializados, pero agora terá que estudar se os feitos revisten carácter xurídico penal. Se é así, formularase unha querela ante do próximo 30 de xuño, dado que nesta data prescribirían os posibles delitos que se cometeron en 2011. 

A Fiscalía recibiu este mércores a denuncia da Axencia Tributaria relacionada con Ronaldo e o Imposto sobre a renda de non residentes (IRNR) referido a 2011 e outros posibles delitos fiscais agravados de 2012 e 2013. A cifra total defraudada ascendería a 15 millóns de euros. 

Pola súa banda, os técnicos do Ministerio de Hacienda consideran "acertada" a denuncia pero lamentaron a demora da AEAT en remitila sobre un asunto "tan complexo" á Fiscalía, que deberá formular a súa querela antes do 30 de xuño para evitar que prescriba penalmente o presunto delito cometido no IRNR de 2011. 

Como sinala o colectivo, o futbolista portugués podería incorrer nun delito fiscal en 2011, que leva penas de prisión dun ano, e noutros dous delitos fiscais agravados en 2012 e 2013, ao superar as cotas presuntamente defraudadas os 600.000 euros.  

Estes dous delitos leva penas de prisión de dúas a seis anos por cada un deles, o que implicaría a petición da Avogacía do Estado dunha pena mínima total de cinco anos. Aínda que o xuíz podería aplicar a atenuante moi cualificada de regularización extemporánea introducida no Código Penal en 2013 e reducir a pena á metade ou á cuarta parte de cada delito fiscal se o xogador recoñece os feitos e paga as cotas defraudadas, os intereses e as multas no prazo máximo de dous meses desde a citación xudicial como investigado. 

Se o xuíz reducise as penas á cuarta parte, a pena de prisión total quedaría en 15 meses, polo que ao carecer de antecedentes podería acordar que non entre en prisión, mentres non sexa condenado no tempo da pena suspendida. 

O dianteiro do Real Madrid resgardou os seus ingresos por dereitos de imaxe en diversas empresas de Illas Virxes desde o ano 2009. Por mor da campaña da Axencia Tributaria para perseguir a fraude no mundo do fútbol o portugués regularizou a súa situación, legalizando a súa fortuna antes de ser investigado. 

Estímase que o portugués aínda ten ao redor de 150 millóns depositados nas citadas Illas Virxes.