O aleiro catalán Sergi Vidal, xogador do Breogán na pasada tempada, anunciou este martes, aos 38 anos, a súa retirada do baloncesto profesional, logo de 20 tempadas nas que xogou en oito equipos distintos e gañou dez títulos. "Logo dun tempo meditándoo, chegou o momento. Decidín colgar as botas e deixar a práctica do deporte profesional. Foron 20 tempadas cheas de felicidade, sacrificio, esforzo e dedicación plena ao que máis me gustou facer na vida, xogar ao BALONCESTO", explicou nunha carta publicada nas súas redes sociais.
🏀👋🏼 pic.twitter.com/ZvgTs3km76
— Sergi Vidal (@sergividal9) December 17, 2019
O aleiro, de 1,98 metros, déixao tras conquistar dúas Ligas ACB co TAU Cerámica (2002 e 2008), catro Copas do Rei (co TAU en 2002, 2004 e 2006 e co Real Madrid en 2009) e outras catro Supercopas de España co TAU (2005, 2006, 2007 e 2008).
Ademais de no Breogán, Vidal militou no Joventut de Badalona (en dúas etapas), Lagun Aro GBC, Unicaja, Fuenlabrada e Manresa. Nestes dous últimos equipos, fíxoo este ano con contrato temporal, tras recuperarse dunha operación de xeonllo, pero o seu físico xa dixo basta.
"Déixoo sentíndome moi querido e coa satisfacción de dar sempre o meu cento por cento, defender con orgullo cada unha das camisetas que vestín e antepoñer as necesidades do equipo ás miñas, intentando sempre ser un bo compañeiro, profesional e estar aí para o que fixese falta", resume. O xogador badalonés retírase tras completar 641 encontros en ACB, na que anotou 4.087 puntos, repartido 1.189 asistencias e capturado 1.686 rebotes.
Para Vidal, empeza agora "unha nova vida chea de retos e proxectos persoais" que afronta "coas mesmas ganas e paixón que o fixo ese mozo de Badalona con destino a Vitoria, pasando por Madrid, San Sebastián, Málaga, novamente Badalona, Lugo, Fuenlabrada e finalmente Manresa".
"Non é unha despedida, BALONCESTO, ¡é un ata pronto!", conclúe Sergi Vidal, que se despide dando as grazas en catalán, castelán, vasco e galego: "Moltes gràcies, muchas gracias, eskerrik ascko, moitas grazas".
