O enfado cústalle 17.000 dólares a Serena Williams

A tenista foi sancionada por recibir axuda desde o palco, romper a raqueta contra o chan e abuso verbal contra o árbitro

Serena Williams. EFE
photo_camera Serena Williams. EFE

Serena Williams foi multada con 17.000 dólares polos organizadores do Aberto de EE UU por cometer tres violacións do código de conduta durante o segundo set da final feminina que perdeu este sábado fronte á xaponesa Naomi Osaka por 6-2 e 6-4.

Williams foi sancionada no segundo set polo xuíz de cadeira, o portugués Carlos Ramos, por recibir axuda desde o palco do seu adestrador, Patrick Mouratoglou, romper a raqueta contra o chan e abuso verbal ao acusalo de "ladrón".

As accións de Williams, que na rolda de prensa posterior ao partido dixo que as sancións foron "sexistas", eclipsaron o triunfo de Osaka, de 20 anos, que se converteu na primeira tenista xaponesa que gaña o Aberto de Estados Unidos e un torneo do Grand Slam.

Williams, de 36 anos, que disputou a súa décimo cuarta final do Aberto de Estados Unidos, non puido lograr o seu sétimo título no último torneo de Grand Slam da tempada e o vixésimo cuarto da súa carreira profesional, o que lle permitiu empatar coa lendaria australiana Margaret Court, que ten a mellor marca.

A estadounidense recibiu un premio de 1.850.000 dólares por xogar a final. 

Comentarios