O Valencia ficha por dúas tempadas a Marcelino e esquécese de Setién

O adestrador asturiano Marcelino García Toral comprometeuse co Valencia para un período mínimo de dúas tempadas, informaron fontes do club valenciano. 

Marcelino chega ao Valencia tras unha tempada sen adestrar, xa que en agosto do ano pasado foi destituído como técnico do Villarreal, club no que permaneceu tres anos e medio.

O novo adestrador do equipo de Mestalla iniciou a súa traxectoria como técnico na elite do fútbol español no Sporting de Xixón e posteriormente dirixiu o Recreativo de Huelva, Racing de Santander, Zaragoza, Sevilla e Villarreal.

No comunicado difundido polo club confírmase que o Valencia e o técnico alcanzaron "un total acordo" para que Marcelino sexa o adestrador do primeiro equipo do club de Mestalla polo menos durante as campañas 2017-2018 e 2018-2019.

A presentación oficial de Marcelino como técnico da Valencia efectuarase tras a disputa do último partido da presente Liga e ata esa data as partes non realizarán declaracións públicas.

O Valencia negociara con Quique Setién, co que incluso chegou a un principio de acordo que non chegou a concretarse quizais pola errática fin de tempada do extécnico do CD Lugo á fronte da UD As Palmas. De todos os xeitos, ao cántabro non lle faltan 'noivas' e agora fálase do interese do Real Betis por facerse cos seus servizos, unha vez destituído Víctor Sánchez del Amo.