O Paris Saint-Germain (PSG) pechou este venres a incorporación da internacional española Vero Boquete, que defenderá dúas tempadas a camiseta do conxunto francés. O PSG confirmou a fichaxe na súa web oficial, na que explica que espera da centrocampista ofensiva española que achegue a súa "técnica" de xogo e recorda que Boquete axudou ao Frankfurt a derrotar ao equipo parisiense na final da liga de Campións en 2015.
A xogadora galega pasou o recoñecemento médico e asegurou en declaracións ao club francés que é "un orgullo" defender a súa camiseta. "Estou moi contenta, sei que chego a un club moi grande. Veño con moita ambición de gañar títulos e poder axudar ao equipo coa miña experiencia e as miñas calidades futbolísticas. Asinei para axudar ao equipo a que sexa aínda un pouco máis grande", sostivo a futbolista.
O director xeral delegado do equipo feminino do PSG, Philippe Boindrieux, apuntou que se trata dunha xogadora "técnica". Boquete incorpórase ao conxunto francés despois de pasar dúas tempadas en Alemaña enrolada nas filas do Frankfurt e Bayern de Múnic.
A xogadora de Santiago de Compostela, que cumpriu en abril 29 anos, anunciara días atrás a súa intención de deixar o Bayern, co que lle quedaba unha tempada de contrato, e cambiar Alemaña por Inglaterra ou Francia.
