O McLaren segue sen levantar cabeza

O McLaren de Fernando Alonso segue con problemas. Este martes, o seu compañeiro Stoffel Vandoorne, con pneumáticos brandos, non superou o mellor cronómetro da escuadra colleitara a pasada semana con ultra brandos e tan só puido completar 34 voltas, todas elas nas primeiras dúas horas da sesión.

E é que a sesión do piloto belga viuse interrompida por un problema eléctrico coa unidade de potencia do seu monopraza. Uns problemas que se suman aos fallos aparecidos a semana pasada.

O brasileiro Felipe Massa (Williams) marcou o mellor tempo na sesión matinal de adestramentos da Fórmula Un celebrada no Circuíto de Barcelona-Cataluña, onde o Ferrari de Sebastian Vettel foi o que máis voltas deu nas primeiras catro horas.

Así comezou a segunda semana de ensaios en Montmeló, onde nos seguintes catro días as escuadras deberían mostrar con máis exactitude o que realmente ofrecerán os coches que sairán desde a grella de saída de Melburne (Australia) a finais de marzo, carreira coa que se dará o pistoletazo de saída á tempada.

O Williams de Felipe Massa, con compostos súper brandos, parou o cronómetro en 1 minuto, 19 segundos e 726 centésimas, quedándose a 2 centésimas da marca do trazado que Valtteri Bottas (Mercedes) pulverizou hai seis días cos mesmos compostos que o brasileiro (1:19.705).