O Deportivo da Coruña acaba a tempada como a casa das leas

Víctor Sánchez del Amo, adestrador do Deportivo, asegurou este venres que o xogador portugués Luis Carlos Correia, Luisinho, ameazouno e que Alberto Lopo foi "bipolar" nos adestramentos, e fixo repaso da tempada e os conflitos nunha comparecencia, a modo de comunicado, na que só aceptou preguntas sobre o partido ante o Madrid.

Antes de debullar todos os problemas da tempada, o técnico afirmou que ía dar toda a "información" para non alimentar "máis especulacións", tras apartar a Luisinho e Lopo, e despois de que o axente do xogador luso asegurase que Víctor intentou "destruír" a súa carreira e de que varios xogadores fagan declaracións públicas que evidenciaron a ruptura do vestiario.

Primeiro abordou o caso de Lopo, que esta semana se adestrou á marxe do grupo, apartado polo corpo técnico, por "terse negado a adestrar dúas veces". "Despois dunha pretempada sensacional, un traballo magnífico e unha entrega exemplar, Lopo tivo un comportamento bipolar: bo cando vía que ía xogar e oposto cando vía que non ía xogar", revelou Víctor. O corpo técnico intentou "axudarlle motivándoo", pero ese comportamento "foise acrecentando" e propuxo unha sanción por ausentarse de dous adestramentos.

De Luisinho dixo que a tempada pasada o club, que incorporou ao técnico a falta de oito xornadas, informouno de "situacións conflitivas" que tivera con compañeiros e empregados e do seu "carácter agresivo e difícil de controlar". Os problemas empezaron no segundo partido de Víctor como técnico, o primeiro no que puido contar co portugués, ante o Atlético de Madrid. "Imos perdendo, facemos cambios e substituímolo. Como pasa moitas veces en xogadores que teñen ese comportamento ante as adversidades, quéntase e pide explicacións no vestiario faltando ao respecto, dun xeito que non corresponde", relatou o adestrador, quen afirmou que o xogador luso non pediu "desculpas" ao grupo.

Despois, en Elxe, tras un 4-0 en contra, Luisinho "montou un escándalo no vestiario" e Víctor deixouno "pasar" polo que se estaba "xogando" o equipo. O corpo técnico cambiou as normas esta tempada e implantou un código interno que se aplicou en agosto nun incidente entre Alejandro Arribas e Luisinho, que se enfrontaron no campo e, tal e como revelou este venres o central madrileño e o adestrador, continuou no vestiario. "Luisinho provoca unha segunda pelexa no vestiario que acaba con Lux cun golpe nas costas e xa tiñamos lesionado de gravidade a Fabricio", declarou o preparador branquiazul.

Luisinho foi suspendido catro días de emprego e cando se reincorporou "o seu comportamento" foi "moi bo", algo que eloxiou o técnico, ata que "no mercado de inverno" o lateral pediulle que lle axudase a saír do club. "Dígolle que iso ten que comunicalo ao club, non ao adestrador. A súa actitude cambia. Cando ve que non vai xogar, os venres dóelle o xeonllo pero o luns está dispoñible para xogar e iso repítese moitas veces", indicou Víctor, quen engadiu: "Tratamos de convencelo de que dese xeito non se pode traballar e démoslle oportunidades". "Chegou a ameazar ao adestrador dicindo que tiña que xogar e que, se non, íame crear moitos problemas. Niso si se está esforzando, polo que se ve", apuntou.

Recentemente, "na semana previa ao Xetafe", a finais de abril, prodúcese o "maior acto de indisciplina" de Luisinho, tras queixarse no vestiario pola multa proposta para Lucas Pérez e Oriol Riera, que tiveran unha "pequena liorta" produto "da tensión". "Cando comunicamos a sanción polo incidente, houbo unha discusión tremenda, non calaba, faltoulle o respecto aos compañeiros e ao adestrador, tamén desobedeceu ao director deportivo. Ante esa rebeldía démoslle a oportunidade de acougarse, non a aceptou, e sacámolo do adestramento e abríuselle outro expediente", declarou. "A estes xogadores déronselles moitas oportunidades de reaccionar, tanto que ata o grupo se sentiu ofendido", sentenciou o adestrador.

Víctor expuxo que "todo iso xera moitos descoidos no grupo" e ao mesmo tempo negou que "manipule" aos xogadores, como dixo o axente de Luisinho. Tamén criticou que, despois da primeira volta, se crearan "unhas expectativas tremendas" sobre o equipo e se falara de "Europa" porque "distrae" ao equipo e "baixa o nivel de competitividade".

Á procura de explicacións sobre o baixón da segunda volta, indicou que o Deportivo non se reforzou, mentres que "dez equipos" ficharon xogadores e "oito melloraron" os seus resultados, e tamén o achacou "ao cansazo" e as "lesións" e a que se lle escaparon "puntos dun xeito incrible". Igualmente, dixo que no Deportivo os empates foron "ninguneados" cando "sumar é o importante", e recordou que o equipo logrou "o obxectivo" e mellorou a puntuación que tivera desde 2010.

Tamén criticou que a derrota (0-8) ante o Barcelona, a máis avultada da historia do club, fora catalogada como "vergoñosa e histórica" e dixo que o Deportivo, con Raio e Celta, foi o que máis ocasións lle xerou nos dous partidos cos azulgranas: "29 remates". Para rematar, agradeceu "os comentarios acedos, negativos e destrutivos" cara á súa persoa porque "nese ambiente xérase unha capacidade de aprendizaxe brutal". "Chegamos a este punto con convicción de que nos equivocamos moitísimo, pero analizámolo con autocrítica e atopamos solucións para seguir crecendo. O que sen dúbida fixemos foi aprender e sentímonos máis preparados para retos no futuro", sinalou antes de asegurar que as súas palabras non foron "unha despedida".