O Cádiz, primeiro rival do Racing de Ferrol na súa loita polo ascenso

UCAM Murcia-Real Madrid Castela e Racing Santander-Reus son os emparellamentos entre os primeiros clasificados de cada grupo de Segunda B que buscarán dúas prazas na Segunda división, segundo o sorteo que tivo lugar este luns pola tarde na sede da RFEF en Las Rozas.

Os vencedores de cada eliminatoria lograrán o ascenso directo, mentres que os perdedores uniranse aos gañadores das restantes eliminatorias nas que participan os segundos, terceiros e cuartos da primeira fase de Segunda B.

O UCAM Murcia acabou na cabeza do grupo IV, o Castela do II, o Racing do I e o Reus do III. A ida xogarase en Murcia e Santander e a volta en Madrid e Reus.

Para dilucidar o campión da categoría, o vencedor da eliminatoria Racing-Reus xogará como local na ida da final e a volta terá lugar no campo do gañador do enfrontamento UCAM-Castela.

O sorteo da segunda eliminatoria terá lugar o próximo día 30 de maio tamén na sede da RFEF.

Na loita pola permanencia que dilucidarán os equipos que acabaron cuartos pola cola de cada grupo as confrontacións serán Cacereño-Linares e Olimpic-Leioa.

RACING DE FERROL. O único equipo galego na pugna por ascender a Segunda División, o Racing de Ferrol, terá que verse as caras cun dos cocos da categoría, o Cádiz. 

Os de Miguel Ángel Tena xogan coa baza de que a volta da eliminatoria xogarase na Malata, aínda que non se pode dicir que atravesen polo seu mellor momento de xogo da tempada.

Líderes desde a xornada 7 de liga, a súa mala xeira de resultados das últimas semanas, coa derrota no último partido ante o xa descendido Atlético Astorga (2-1) como colofón, privou aos ferroláns dun primeiro posto que se antollaba tan merecido como decisivo para soñar co ascenso.

O Racing de Santander percorreu o camiño contrario. Tras un inicio irregular chegou ao tramo final no seu mellor momento e foi quen de arrebatarlle esa tan ansiada primeira praza ao Racing de Ferrol na última xornada.