Diego Costa e Conte asinan a paz... 'a medias'

O hispano-brasileiro Diego Costa e o seu adestrador no Chelsea, Antonio Conte, asinaron unha pequena tregua tras reincorporarse o dianteiro aos adestramentos, dos que levaba apartado varios días.

Costa e Conte, cuxa relación desde o primeiro instante foi máis que tensa -en pretemporada o xogador intentou en balde regresar ao Atlético de Madrid para volver porse ás ordes do Cholo Simeone-, seguirán con todo sen dirixirse a palabra e a convivencia entre ambos para o que resta de tempada promete seguir sendo explosiva, a tenor das informacións que chegan desde Inglaterra.

CONFLITO. O dianteiro foi apartado do equipo a pasada semana logo dunha forte discusión co adestrador italiano, e incluso chegou a perderse o partido ante o Leicester, o que fixo saltar as alarmas por un posible traspaso no vixente mercado de inverno.

A sombra do Atlético, que desexa tanto como o xogador que se produza o reencontro, e dos infinitos millóns chineses que non deixan de tentar aos talentos europeos, planearon durante varios días por Stamford Bridge, pero finalmente todo parece indicar que Diego Costa terminará a tempada no equipo blue.

PAZ MOMENTÁNEA. A mediación dos compañeiros no Chelsea do hispano-brasileiro resultaron claves para canalizar as augas e resolver un conflito que ameazaba con enquistarse. O título de Premier League está máis que a tiro -os de Antonio Conte son líderes destacados e veñen en clara liña ascendente, grazas en boa parte á achega do dianteiro- e semella que ambas as partes, xogador e adestrador, serán o suficientemente profesionais como para antepor o interese colectivo ao persoal.

A pesar de todo fontes inglesas sosteñen que unha reconciliación real entre ambos é completamente inviable e que con total probabilidade o seu pacto de non agresión durará ata o final da vixente tempada. A partir de aquí o destino de ambos podería separarse, co Atlético de Madrid no horizonte de Diego Costa.