A Federación Galega de Fútbol celebrou este sábado a Asemblea Xeral Ordinaria para pechar a tempada 2014-2015 e empezar a próxima 2015-2016. O acto celebrouse na Sala Compostela do Palacio de Congresos e Exposicións de Santiago, en San Lázaro.
Ademais da presentación de contas, do plan de competición, das modificacións regulamentarias e do informe do presidente, cos correspondentes rogos e preguntas, entregáronse sete distincións especiais.
O momento máis emotivo viviuse cando Germán Jiménez Martínez, exárbitro e exarticulista de 93 anos, recolleu o seu premio a toda a súa traxectoria. Matilde Alonso foi premiada a título póstumo como directiva, por ser unha persoa crave na promoción e o desenvolvemento do fútbol feminino en Galicia. O seu fillo foi o encargado de recoller o premio.
Arsenio Iglesias recolleu o premio polo seu traballo como adestrador, especialmente durante a época do Superdépor, mentres que Fran González e Jorge Otero recibiron o galardón como xogadores. No apartado de medios de comunicación, Jesús Lodeiro recolleu un premio por ser o fundador e condutor do programa da Radio Galega Galicia en goles.
A Secretaría Xeral para o Deporte recolleu o seu premio pola promoción do deporte de base e os hábitos saudables mediante o plan Xogade.