Novos rivais para Choco, Cerceda e Dépor B no ascenso a Segunda B

CD Choco-Zaragoza B, Azuquena-Cerceda e Deportivo B-Navalcarnero son as eliminatorias nas que quedaron emparellados os tres equipos galegos que xogarán a segunda rolda da fase de ascenso a Segunda División B, segundo deparou o sorteo celebrado este luns na Federación Española de Fútbol (RFEF).

Un salto de categoría que xa logrou o outro representante do fútbol galego na fase de ascenso, o CD Boiro, tras vencer ao Caudal de Mieres na eliminatoria de campións de grupo, despois de gañar por 2-0 no seu campo e caer pola mínima no partido de volta disputado en terras asturianas.

O filial do Deportivo enfrontarase ao Navalcarnero, que finalizou segundo no grupo VII da Terceira División. Os coruñeses, que xogarán o primeiro partido na casa, superaron a primeira rolda tras eliminar ao Palmar, mentres que os madrileños deixaron fóra da pelexa polo ascenso ao Tenisca.

Pola súa banda, o Choco, que superou na anterior eliminatoria ao Badaxoz, medirase ao filial do Zaragoza, xogando o primeiro partido en Redondela e a volta en Zaragoza.

O último dos equipos galegos que loitará por alcanzar a última rolda, o Cerceda, xogará contra o CD Azuquena, terceiro clasificado do grupo XVIII. O club de Guadalaxara superou na rolda anterior ao Arroyo.