O céltico Jonny, a un paso de ser traspasado ao Atlético de Madrid

O Celta de Vigo e o Atlético de Madrid alcanzaron un principio de acordo para o traspaso do internacional sub21 Jonny Otto, que depende unicamente de que se asinen os contratos e o xogador supere o recoñecemento médico ao que será sometido nas próximas horas, segundo informaron fontes próximas ao futbolista. Jonny, no entanto, marcharase cedido o primeiro dos seis anos que asinará co Atlético a un club que militará a tempada 2018-19 na Premier League.

O conxunto branquivermello xa presentou a finais de maio unha oferta de sete millóns de euros, máis dous en variables, polo defensa, pero entón o club presidido por Carlos Mouriño rexeitouna porque estaba lonxe dos 18 millóns de euros fixados na súa cláusula de rescisión. Do mesmo xeito que Sergi Gómez e Radoja, Jonny foi apartado do resto do persoal celeste por decisión dos dirixentes do club vigués pola súa negativa a ampliar o seu contrato, o cal finaliza en xuño de 2019.

O canteirán e Sergi Gómez —Radoja segue en Serbia con permiso do club— adestraron toda a semana en solitario nas instalacións deportivas da Madroa xunto ao preparador físico Carlos Massa, mentres o persoal está concentrada na Toxa, no municipio pontevedrés do Grove.