O exseleccionador español Vicente del Bosque afirmou este luns en Vilagarcía de Arousa que "aparentemente" Francia, vixente campioa do mundo, é "a gran favorita" para conquistar a Eurocopa, pero advertiu que neste torneo "aventúrase algo e logo sae outra cousa moi diferente".
"Creo que será unha competición moi igualada, moi difícil, e a todos vaille a custar, sobre todo cando entremos en cuartos. Hai moita claridade en canto á primeira fase pero moita incerteza en canto entremos nos oitavos e os cuartos", apuntou o exseleccionador nacional tras participar na presentación do proxecto 'Xuntos, saborea Galicia'.
Del Bosque dixo ter “confianza” no papel que fará o equipo español, e defendeu a convocatoria do técnico Luís Enrique Martínez.
"A miña opinión non vale para nada, a que vale é a do seleccionador. Se el decidiu iso é porque cre que hai outros mellores. Son incondicional das decisións que tome Luís Enrique", respondeu ao ser cuestionado pola ausencia do goleador do Celta Iago Aspas.
O exseleccionador asume que España encara o torneo cun plantel "moi renovado" e "moi novo", pero cre que os xogadores teñen "enerxía e capacidade" para asinar unha gran actuación.
