O belga Greg Van Avermaet, campión olímpico en ruta, vestiuse este luns coa camisola amarela do Tour mercé ao triunfo do BMC na contrarreloxo por equipos da terceira etapa disputada en Cholet cun percorrido de 35,5 quilómetros, cun segundo posto do Sky que lle permite a Chris Froome recuperar gran parte do tempo que se deixou na caída da primeira xornada.
Voo rasante do BMC nun percorrido rompepernas, esixente, no que se mostrou superior desde os primeiros quilómetros. A escuadra estadounidense, infestada de especialistas, marcou en meta un tempo de 38.46 minutos, a unha media de 54,944 kms/hora.
BMC superou o pulso aos grandes favoritos do Sky, que quedou a 4 segundos do obxectivo. O Quick Step foi terceiro a 7, o Mitchelton cuarto a 7 e o Sunweb de Dumoulin a 11. Non puido defender con éxito a camisola amarela o eslovaco Peter Sagan, xa que o Bora só foi sétimo a 50 segundos.
Movistar, que saíu en terceiro lugar, salvou os mobles coa décima praza a 53 segundos do gañador e a 49 do Sky de Froome, o que significa que o britànico recorta tempo a Landa e Valverde e amplíao respecto de Quintana.
O BMC chafou a festa ao Sky, que xa pensaba en vestir de amarelo a Geraint Thomas. Os homes de Rochie Porte deron unha lección de coordinación e demostraron por que foron 2 veces campións do Mundo en 2014 e 2015. O seu esforzo colectivo colocou a camisola amarela na costas de Greg Van Avermaet.
O ciclista belga, tras longo intre na cadeira quente, subiu ao podio a vestirse coa peza coa que soña todo corredor, escena que non é nova para o clasicómano nacido en Lokeren fai 33 anos, xa que en 2016 gañou unha etapa e luciu a camisola amarela durante 3 días. En Cholet gañou o terceira crono por equipos da tempada, tras as conquistadas en Tirreno Adriático e Volta a Suíza.
No xeneral os favoritos van tomando posicións, xa pensando no Muro de Bretaña e no pavé. De momento, Van Avermaet está á fronte co mesmo tempo que o seu compañeiro estadounidense Tejay Van Garderen e un segundo sobre Geraint Thomas.
O británico Chris Froome logrou recuperar boa parte do tempo que perdeu coa caída da primeira etapa. Foi o favorito máis beneficiado xunto a Dumoulin e pódese dicir que puxo a cero o contador. Cumpriu o obxectivo para iniciar a ansiada remontada.
Este martes dispútase a cuarta etapa entre La Baule e Sarzeau, cun percorrido de 195 quilómetros.
