O adestrador do Celta de Vigo, Eduardo Berizzo, decidiu reservar a cinco dos seus habituais titulares –Jonny, Cabral, Wass, Tucu e Guidetti– para o partido do próximo xoves contra o Genk, no que o seu equipo se xogará o pase ás semifinais da Europa League.
Ningún deles, titulares no partido que o pasado xoves abriu a eliminatoria, viaxarán co equipo a Granada, onde os celestes apurarán as súas escasas opcións de engancharse á pelexa por entrar en Europa a través da liga.
A principal novidade na lista de convocados é a presenza de Álvaro Lemos, quen regresa tras superar a lesión que sufriu no recto anterior dereito o primeiro de abril.
A convocatoria de 18 xogadores está formada por: Sergio Álvarez, Iván, Hugo Mallo, Fontás, Marcelo Díaz, Radoja, Bongonda, Pape, Hjulsager, Iago Aspas, Sisto, Beauvue, Jozabed, Planas, Señé Sergi Gómez, e Roncaglia.