O Barça volverá intentar fichar a Neymar, segundo Le Parisien

O Barcelona, tocado tras o seu primeiro tropezo na liga en San Mamés non renunciou a fichar a Neymar e vai presentar unha nova oferta a semana próxima ao París Saint Germain (PSG) a pesar da distancia nas posicións co club francés, segundo Le Parisien.

O xornal, que non precisa as súas fontes, afirma este domingo que o club catalán fará unha nova proposta polo brasileiro, aínda que recoñece que resulta difícil entrever cal pode ser o seu contido logo de ceder ao Bayern de Múnic a Philippe Coutinho, que era unha das pezas mestras para unha eventual fichaxe de Neymar.

O PSG aceptara a idea dos barcelonistas de venderlles o seu dianteiro estrela nunha operación que incluíría a cambio algún xogador do Barça.

Pero esixía que houbese ademais polo menos 100 millóns de euros, que fosen dous os futbolistas, e dunha lista restrinxida na cabeza da cal estaban Coutinho e Ousmane Dembelé.

O problema é que unha vez que se esfumou a opción de Coutinho, Dembelé tampouco está polo labor, e fixo saber aos dirixentes do PSG e ao seu adestrador, Thomas Tuchel, que quere quedar no equipo catalán.

Por todo iso, Le Parisien especula con que o interese manifestado polos directivos do Barça podería ser simplemente un farol para dar a impresión de que se esforzan por conseguilo e satisfacer a Messi, que fixo presión para a volta de Neymar.

En calquera caso, tamén quererían que a estrela brasileira tomase a palabra para manifestar claramente que quere volver vestir a camiseta blaugrana.

Persoas da súa contorna veñen repetindo esa mensaxe desde o mes de maio con maior ou menor insistencia, algo que vén chocar co discurso do PSG, que nos últimos días trata de instalar a idea de que Neymar non só segue formando parte do seu persoal, senón que ten aínda contrato para tres tempadas e que quedará se non hai unha oferta consistente.

Tuchel volveu insistir este sábado no seu argumento -a pesar de que non o convocou para o segundo partido de liga deste domingo- de que para el un PSG forte é un PSG co astro brasileiro, e de que ten intención de defendelo e protexelo para volver gañar a confianza da inchada.

En canto á opción do Real Madrid, tanto Le Parisien como L'Équipe afirman este domingo que non cesaron os contactos regulares co representante do xogador, Pini Zahavi.