Alejandro Gómez (Vigo, 1967), o mellor fondista galego da historia, está ingresado desde a pasada semana no hospital vigués Álvaro Cunqueiro, rodeado de familiares e amigos, tras detectarlle un tumor no cerebelo que resulta inoperable. A extrema gravidade da súa situación deuse a coñecer nas últimas horas aos responsables das entidades nas que traballaba, levantando a lóxica preocupación, informa La Región.
O atleta vigués asume a súa delicada situación, que lle foi comunicando aos seus máis achegados nos últimos días. Ten o apoio próximo da súa nai e da súa muller, ademais doutras persoas da súa máxima confianza como a súa psicóloga.
"Que a xente me recorde como a boa persoa que fun", declara Alejandro Gómez a Faro de Vigo, consciente da gravidade da situación que atravesa.
"Que dicir, amigo, nunca esquecerei a un dos meus maiores rivais e todos os duelos que tivemos nas carreiras. Ano tras ano loitando contra ti. Nunca te esqueceremos, campión, es un referente e un dos grandes", escribiu Abel Antón nas súas redes sociais.
As espléndidas condicións para a práctica do atletismo de Gómez comezaron a chamar a atención xa en categorías inferiores. A súa facilidade e elegancia para correr convertérono en referencia galega, española e internacional tanto en pista como en campo a través. Formou parte da selección española en diferentes eventos en categoría absoluta en 41 ocasións entre 1987 —con 20 anos— e 2005 —xa con 38—, o que dá conta dunha longa carreira no atletismo que pechou en 2006, cando aínda non cumprira os 40 anos.
Foi tres veces olímpico, en Seúl 88, Barcelona 92 e Atlanta 96. Ademais, foi noveno no Mundial de pista de 1991 e quinto no Europeo de 1998. Un ano antes batera a marca de España de maratón.
