O adestrador do Sporting de Portugal, Rubén Amorin, volveu comentar a posibilidade de que Cristiano Ronaldo regrese ao equipo no que se formou e asegurou que "todos" no club o queren. Fíxoo un día logo das polémicas declaracións do futbolista portugués contra o seu actual club, o Manchester United, do que asegurou sentirse "traizoado", e contra o seu adestrador, Erik Ten Hag, do que dixo que non lle ten ningún respecto.
Na rolda de prensa posterior á vitoria da formación verdibranca ante o Famalicao na liga portuguesa (1-2), Amorim destacou, con todo, que é Cristiano "quen decidirá o seu futuro".
"Fixéronme esa pregunta mil veces. Ronaldo é xogador do Manchester United. Todo o mundo no Sporting quéreo", dixo. Engadiu que é Cristiano quen "di que quere facer as cousas con tranquilidade para seguir o seu futuro. Él é quen decidirá o seu futuro".
O UNITED, Á ESPERA
O Manchester United está "a considerar" a súa resposta ás duras acusacións de Cristiano Ronaldo e daraa a coñecer "despois de que se esclareceron todos os feitos", aínda que por agora aposta por centrarse na "unidade". "O club considerará a súa resposta despois de que todos os feitos sexan establecidos" sinalou o United nun breve comunicado.
Tras a vitoria ante o Fulham a domicilio por 1-2 grazas a un gol no último minuto, o Manchester United asegura que está centrado agora en "preparar a segunda parte da tempada e continuar o impulso, a fe e a unidade que se está creando entre xogadores, adestrador, equipo técnico e afeccionados".
O astro luso, que se perdeu os dous últimos partidos do United por enfermidade, falou das súas últimas semanas no equipo, marcadas pola inestabilidade. Ronaldo atacou duramente a Erik Ten Hag, quen o castigou un partido sen xogar por marcharse antes de tempo do encontro contra o Tottenham e negarse a saltar ao terreo de xogo. "Non o respecto, porque el non me respectou a min", sentenciou.
