O xulgado do Penal número 1 de Ourense absolveu a Álvaro Ratón, porteiro do Zaragoza, acusado de agredir sexualmente e lesionar a unha muller nas inmediacións dun local de copas do Carballiño en 2018.
Ademais, a xuíza deixou sen efecto a prohibición de que o sospeitoso se comunicase por calquera medio ou se aproximase a menos de 300 metros da denunciante. A maxistrada indica na sentenza que "non quedou acreditada, máis aló de toda dúbida razoable", a participación do acusado nos feitos.
"Ditar unha sentenza condenatoria coas probas de que se dispón suporía a infracción do principio de presunción de inocencia e do principio in dubio pro reo”, asegura a xuíza no fallo, contra o que cabe presentar recurso ante a Audiencia Provincial de Ourense. Así, sinala que a versión ofrecida pola denunciante sufriu variacións e que carece de corroboracións periféricas.
A maxistrada destaca que "non hai ningunha testemuña que vise como a agarraba por un ou ambos os brazos; que vise como a intentaba bicar ou a bicou contra a súa vontade; que vise que se baixou os pantalóns; que vise que lle meteu a man na súa roupa interior; ou que vise que a empuxou contra un banco, escaleira ou parede”, todo iso a pesar da existencia de dous locais próximos "nos que a xente entra e sae continuamente, en especial en noites como a que ocorreron os feitos, a noite de San Xoán".
