Cunha tripla sobre a bucina do internacional belga Sam Van Rossom o Valencia Basket asaltou o Multiusos Fontes do Sar tras dobregar ao Monbus Obradoiro (78-81), que chegou a gañar de doce no terceiro cuarto pero se atascou no último, cando, ademais, sufriu para frear na pintura a Will Thomas, decisivo nos últimos minutos.
O primeiro cuarto deixou sensacións estrañas para o Obradoiro: dominou o marcador con pequenas vantaxes (14-9; 17-13; 19-15), sostido polo liderado en ataque do grego Vasileiaidis, pero, tras un tempo morto da Valencia, a súa capacidade anotadora secouse nos tres últimos minutos. Cun punto máis de intensidade defensiva, o equipo de Jaume Ponsarnau reaccionou ata pechar, con canastras de Vives e Sergi García, o cuarto con vantaxe (19-23). Continuou bloqueado o Obradoiro. O parcial alargouse 2-15 (de 19-15 a 21-30), pois non anotou nos primeiros catro minutos do segundo cuarto. Tampouco brillou nese momento a Valencia, máis impreciso no tiro, máis inseguro ante a mellora defensiva galega. O refacho cambiou: parcial 9-0 do Obradoiro para igualar o partido (30-30), un equilibro rachado ao final do segundo cuarto cun fabuloso triplo desde oito metros de Vasileiaidis (40-37). Cunha excelente defensa e un xogo coral, o equipo de Moncho Fernándes desarboló á Valencia no terceiro cuarto. A súa vantaxe foi aumentando ata alcanzar os 12 puntos (64-52) a falta de algo menos de dous minutos para entrar no último cuarto.
Ponsarnau pediu o seu segundo tempo morto practicamente seguido. E esta vez si xurdiu efecto. O seu equipo axustou a súa defensa e atopou na pintura a solución ao seu atasco ofensivo (68-61, min.30).
O inicio do último cuarto foi catastrófico para o Obradoiro. Acelerouse en ataque e tardou máis de catro minutos en encestar. Demasiado agasallo para unha Valencia que volvera (70-70, min.35).
Moncho Fernández devolveu a pista a Vasileiadis e Llovet. Catro puntos seguidos deste último osixenaron o equipo galego, castigado no xogo interior por Will Thomas. O norteamericano, esvaecido ata ese momento, foi un martelo para a defensa santiaguesa. Seis puntos seguidos seus puxeron á Valencia por diante a falta de vinte segundos (76-78).
O técnico local pediu tempo morto. Ponsarnau ordenou facer falta. Pozas fallou os dous tiros libres pero o rebote ofensivo de Singler e a súa posterior canastra igualaron o duelo. Outro parón. Lousa do Valencia: tres pases, balón interior para Will Thomas e este saca o balón para que Van Rossom machuque o Obradoiro cunha tripla sobre a bucina.
