Movistar Inter é o primeiro finalista da Copa de España de fútbol sala; os de Jesús Velasco non permitiron que acontecese un segundo burelazo, e derrotaron á escuadra galega, iso si, con moito traballo.
Igual que nos cuartos de final, o conxunto que dirixe Daniel Ibañes practicou un magnífico fútbol sala, e puxo as cousas difíciles ao gran favorito a levar o torneo.
Repetían cinco inicial ambas as escuadras, confiados no bo resultado obtido en cuartos de final.
INICIO CASE PERFECTO. Nos primeiros minutos, aínda que se xogaba en terreo galego, a defensa de Burela, moi atenta, mantiña o perigo afastado da súa portería. Edu repeleu os primeiros disparos, obra de Ricardinho.
Ao contrario, no primeiro achegamento á portería interista, Chino bateu a Jesús Herrero cun certeiro disparo á escuadra e, dous minutos despois, Hélder, de novo nun man a man, fixo o 2-0 para os lucenses. Jesús Velasco viuse obrigado a pedir tempo morto.
Non tardou en empatar o Inter. Apenas dous minutos. Cardinal sacou unha falta á esquerda onde, pegado á banda, Ortiz lanzou un disparo que serviu para que Movistar acurtase diferenzas. Pouco despois, Rafael logrou o empate, a pase de Ricardinho.
Pese ao acoso do equipo madrileño, a zaga laranxa continuou repelendo os ataques de Movistar, que realizou 16 tiros a porta na primeira parte desta semifinal, por tan só 5 dos galegos.
Jesús Herrero, desde a súa portería, anotou o 2-3, aproveitando que Burela sacara porteiro-xogador. E aínda puido facer outro gol, pero a súa parábola foi a parar ao poste.
No último minuto do primeiro tempo, Borja aproveitou unha indecisión de Chano na súa área para remachar o 2-4 co que se iría ao descanso. Excesivo castigo, logo de tanto traballo defensivo.
ESFORZO SEN PREMIO. O choque renovouse como empezou, con todos xogando en campo de Burela. Con paciencia e tesón, os de Daniel Ibañes quitáronse de encima o dominio da máquina verde, trenzando ataques longos. Iago Míguez lograba bater en boca de gol a Alex, que substituíra a Herrero.
Rivillos, mentres, lanzaba fose unha pena máxima. Non chegaba un gol para a tranquilidade do Rei de Copas, e Burela achegábase á meta de Alex González. Con dificultade, pero chegaba. Ricardinho tamén errou un dobre penalti, que lle parou Alex. Ata que Cardinal rematou á rede un servizo de Ortiz (3-5).
Movistar decidiu recular e esperar acazapado ao seu rival. Burela atacou desbocado, e as contras do Inter terminaron sendo letais. Primeiro, Rafael, estrelou a bóla no pau, previa parada de Edu e, despois, Ricardinho puxo a guinda á clasificación marcando un dobre penalti no último minuto.
