O Sevilla, grazas a unha traballada vitoria por 2-1 ante o Celta, alcanzou o Atlético de Madrid, terceiro na Liga, a falta de catro xornadas para a conclusión do campionato e mantén vivo o soño de clasificarse directamente par a Liga de Campións. O Celta, pola súa banda, fixo o seu ensaio xeral para a histórica semifinal da Liga Europa que iniciará a próxima semana contra o Manchester United.
Presentóuselle ao equipo do arxentino Jorge Sampaoli unha boa oportunidade de igualarse no terceiro posto da táboa co Atlético de Madrid despois de que o conxunto colchoneiro perdese o martes no seu estadio ante o Vilarreal (0-1), e non a desaproveitou. Ese resultado tamén era un perigo para os hispalenses, pois o equipo castellonenco acurtaba a cinco puntos a súa desvantaxe cos sevillistas na pugna pola cuarta praza.
Por iso, os tres puntos eran moi importantes para o Sevilla nunha cita na que tamén se recordou que se cumprían once anos, entón un xoves da Feira de Abril, do gol neste mesmo escenario do malogrado Antonio Puerta ante o Shalke 04 alemán, o que deu o pase ao Sevilla á final dunha Copa da UEFA que gañou e que encadeou desde entón unha serie continuada de éxitos da formación andaluza.
Berizzo volveu colocar aos seus titulares sobre o céspede a unha semana de atoparse co equipo inglés en Balaídos
O Celta chegou a Sevilla tamén facendo historia, ao iniciar a próxima semana as semifinais da segunda competición continental ante o Manchester United, o que lle condicionou nesta fase do torneo doméstico, no que se atopa descolgado dos postos europeos. Por iso, o seu adestrador, o arxentino Eduardo 'Toto' Berizzo, fixo descansar o pasado domingo a unha boa parte dos seus titulares no partido que perderon ante o Betis (0-1), pero nesta ocasión volveu colocalos sobre o céspede a unha semana de atoparse co equipo inglés no seu estadio Balaídos.
Os vigueses saíron máis intensos, con máis posesión de balón ante un Sevilla que repetiu o once que lle gañou o pasado venres no Sánchez Pizjuán ao Granada (2-0) pero que atopou nesta ocasión máis dificultades. A pesar diso, foi Vicente Iborra o que aos 22 minutos gozou dunha gran oportunidade de abrir o marcador cun remate de cabeza que acabou co balón repelido pola cepa dun poste.
A ocasión fixo espertar algo ao conxunto local fronte a un rival que, de todos os xeitos, sempre mantivo unha presión adiantada coa intención de ser o protagonista. Con máis equilibrio no xogo, os sevillistas víronse máis fluídos á contra e tamén á espera dalgunha xogada de estratexia, mentres que aos célticos faltoulles algo de decisión ante a meta Sergio Rico, ata o punto de que o tanto estivo máis cerca ao lado local na primeira parte.
O Celta viu como expulsaron ao chileno Pablo 'Tucu' Hernández por dobre amoestación e iso obrigou a Berizzo a reforzar a defensa
A inercia coa que acabou o Sevilla o primeiro período ratificouna pronto no segundo co tanto do arxentino Joaquín 'Tucu' Correa, quen logrou o seu cuarto gol na liga e oitavo na tempada entre todas as competicións. A reacción visitante foi rápida ao sinalar o árbitro un penalti do francés Clement Lenglet ao sueco John Guidetti que transformou Iago Aspas, que sumou o seu decimoséptimo tanto na Liga e que non celebrou pola súa condición de exsevillista.
Pouco despois o Celta viu como expulsaron ao chileno Pablo 'Tucu' Hernández por dobre amoestación e iso obrigou a Berizzo a reforzar a defensa co arxentino Facundo Roncaglia en lugar do dianteiro Guidetti. O Sevilla envorcouse en busca do seu segundo gol e o lateral Sergio Escudero púidoo atopar, pero o balón rexeitouno o traveseiro, o mesmo que noutro remate do francés Samir Nasri.
O tempo correu en contra dos intereses do equipo andaluz ante un conxunto galego que, ante as circunstancias da súa inferioridade numérica, deu por bo o empate pero que tamén tivo a súa oportunidade nas botas do danés Daniel Wass. O dianteiro francés Wissam Ben Yedder, que saíra pouco antes como outra solución de ataque, puxo o 2-1 aos 79 minutos e iso fixo reaccionar aos visitantes nunha recta final do duelo chea de incerteza.
