A Semana de Cine de Lugo premia 'El pan de la guerra' como mellor filme

A cinta de animación El pan de la guerra recibiu o premio do público a mellor película da sección oficial da Semana de Cine de Lugo, que viviu o sábado pola noite a súa xornada de clausura. 

A longametraxe impúxose, con 2,60 puntos, a Una mujer con unas alas tremendas, do cineasta valenciano Pedro Pérez Rosado (2,50 puntos), Holy Boom, de María Lafi (2,42 puntos), Pájaros de verano, de Ciro Guerra e Cristina Galego (2,14 puntos) e a Mujer descalza, de Llorent Barallas (2,13 puntos). 

El pan de la guerra conta a historia dunha nena afgá de once anos, Parvana, que durante o goberno dos talibán debe facerse pasar por un mozo para así alimentar á súa familia en Cabul, tras a detención e encarceramento do seu pai. 

A longametraxe é unha adaptación ao cine da novela The Bredwinner, escrita pola canadense Deborah Ellis, que contou coa produción da actriz e realizadora estadounidense Angelina Jolie. A intérprete asociouse en 2017 coa produtora de animación Cartoon Saloon para producir a longametraxe. "Hai millóns de nenas como Parvana que crecen baixo a opresión ou no medio de conflitos, obrigadas a axudar ás súas familias a sobrevivir nesas condicións", dixo a actriz cando saíu á luz que produciría a cinta. 

OUTROS PREMIOS. Ara Malikian: una vida entre las cuerdas, dirixida por Nata Moreno, recibiu o premio do xurado á mellor película documental. Pola súa banda, As tres caídas de María Santiso, dirixido por Roberto Alvite, foi galardoada co premio do público á mellor película galega. 

O galardón de mellor curtametraxe galega recaeu sobre Marusia, de Pedro Sancho. O de mellor curtametraxe foi para Happy Friday, dirixido por José Antonio Campos Aguilera. 

MENCIÓN ESPECIAL. Ademais, a organización e o xurado da Semana de Cine de Lugo concedeu unha mención especial, "polo especial tratamento dous temas, ás persoas e ao cine" ás seguintes películas: Tal como soy, de Tomás Martín; Antonio Ramos Espejo: el amanecer del cine en China, de Rafael Neto e Nacho Touro; El niño que quería volar, de Jorge Muriel; Trivial, de Fran Manchón; Yayoflautas, de Jesús Martínez Notas; El Jarrón, de Rubén Tejerina; Rellano, de Agustín Rubio; Bailaora, de Rubín Stein; El hombre de la casa, de Jesús López Melgares; Mariñeiro, de Juan Galiñanes, Narote, de David Vázquez Vázquez, Devalar, de Mar García; Limbo, de Daniel Viqueira, Cambio, de Iago de Sant; Pedrón de Freixo, de Ángel Cordeiro Gómez; e El barman de las estrellas, dirixida por Eva Vizcarra Chamero.