O escritor italiano Antonio Tabucchi, considerado un referente literario en Europa, morreu hoxe aos 68 anos de idade en Lisboa, informou a editorial Feltrinelli. O escritor atopábase ingresado no hospital da Cruz Vermella de Lisboa a consecuencia das secuelas dunha longa enfermidade.
Os funerais celebraranse o vindeiro xoves na capital portuguesa, segundo explicou a súa viúva, Maria José Lancastre.
Carreira profesional
Tabucchi, que desde 2004 tiña a nacionalidade portuguesa, naceu en Pisa, norte de Italia, en 1943. Foi profesor de literatura portuguesa, disciplina que impartiu en prestixiosas universidades dos Estados Unidos e Francia e contábase entre os máximos expertos mundiais na figura do poeta portugués Fernando Pessoa.
Foi colaborador do diario italiano Il Corriere della Sera, o francés Le Monde e o español El País. Iniciou a súa carreira como escritor en 1975 coa novela Piazza Italia á que seguiron varias antoloxías de contos, pero se consagrou definitivamente grazas ás novelas Réquiem. Una alucinación (1992) e sobre todo, Sostiene Pereira (1996), ambientada na ditadura de Salazar en Portugal e que foi levada ao cine por Roberto Faenza en 1996 con Marcello Mastroianni.
Mestre en narrativa curta
O compromiso civil e a aura de misterio que predominan no seu estilo literario atópanse nas súas últimas obras importantes La cabeza perdida de Damasceno Monteiro, de 1996, Tristan Muere (2004) e Se está haciendo cada vez más tarde (2001).
Tabucchi foi recoñecido pola crítica literaria como un mestre das narracións curtas, formaba parte do Parlamento Internacional de Escritores, unha asociación de solidariedade con escritores perseguidos.
A súa última novela foi Racconti con Figure publicada en 2011.
Autor dunha obra traducida en 40 linguas e gañador de varios premios internacionais, o seu nome soou como candidato ao Príncipe de Asturias e ao Premio Nobel de Literatura, candidatura que avalaba desde 2000 o Pen Club italiano.
