O director monfortino Dani de la Torre anunciou este mércores que a súa nova película, Live is life, xa ten póster e chegará aos cines o día 13 de agosto.
A película, producida por Atresmedia Cinema, está protagonizada por cinco mozos que debutan na gran pantalla. Adrián Baena é Rodri, un mozo de Barcelona que vai pasar a noite de San Xoán ao lugar de onde procede a súa familia en Galicia, onde se reencontrará cos seus amigos. Albert Espinosa é o encargado de asinar o guión da película, quen tras o éxito de Pulseiras vermellas e Planta 4ª, volve á ficción cinematográfica.
A historia céntrase nun grupo de cinco rapaces a mediados dos anos 80 durante unha noite de San Xoán, na que vivirán unha aventura para tentar cumprir os seus soños e que os cambiará para sempre.
O resto da cuadrilla está interpretada por Juan Manuel del Pozo e Raúl del Pozo, que fan dos irmáns Álvaro e Maza; David Rodríguez é Suso e por último Javier Casellas métese na pel de Garriga.