As Festas do Apóstolo xa teñen o seu programa completo, que este ano aposta por empoderar "ás mulleres", pór en valor aos "artistas galegos" e as "creacións e pensamentos de migrantes" que fixeron de Galicia a súa terra de acollida.
Así o anunciou este martes a edil de Acción Cultural do concello compostelán, Branca Novoneyra, en rolda de prensa, na que destacou que a "intención" deste cartel radica en transmitir a "filosofía e forma de pensar" que hai detrás dos nomes que o presiden.
Aos concertos xa confirmados, como o dunha das cantantes de maior proxección nacional Rosalía, o do músico Rubén Blades e o do grupo de hardrock australiano Wolfmother, súmanse Mala Rodríguez, Mercedes Peón, Bette Smith e a artista Guadi Galego para protagonizar o "Apóstolo das mulleres", como o cualificou Novoneyra.
Todos estes concertos terán lugar na Praza da Quintana, o eixo sobre o que viran as actividades musicais das festas e que a partir do 18 de xullo e durante os sucesivos días, ata o 31 dese mesmo mes, acollerá aos artistas principais.
A mesma praza tamén se moverá ao ritmo de bandas internacionais como os mozambiqueños Timbala Muzimba, que achegarán a música tradicional do seu país ás tendencias contemporáneas de reggae rock, rap ou jazz. As melodías africanas fusionadas con jazz e funk serán achegadas por Ogun Afrobeat e os franceses Dub Inc chegarán cargados de diferentes estilos, desde o dancehall ata o ska e o hip-hop.
MÚSICA 'MADE IN GALICIA'. Selvática, Marem Ladson, Atrás Tigre, Espejos y Diamantes e Cora Novoa conforman o espectáculo de Bandas Galegas do xoves 26 no escenario principal da Quintana, segundo indicou a concelleira na presentación da programación, na que tamén recalcou que soará "música diversa" e "estilos diferentes".
A mesma aposta pola diversidade e os grupos locais é a que segue 'Compostela é música', o evento presidido por sete bandas santiaguesas, nacionais e internacionais que tocarán na Praza do Toural.
Neste sentido, o programa combina "propostas consolidadas" con outras "alternativas", segundo sinalou Novoneyra, a que tamén citou algúns deses grupos como Mega Purple Sex Toy Kit, Mojo Experience ou Antonio Lizana.
CULTURA INMIGRANTE E CULTURA EMIGRADA. "Mostrar a cultura emigrante" con firma galega e a "cultura inmigrante" que acolle a Comunidade é "o obxectivo" do proxecto ONDA, que contará con exposicións, curtametraxes, concertos e conferencias de estranxeiros en Galicia e galegos emigrados do mundo da arte e a cultura, anunciou Novoneyra.
Todas estas actividades terán como punto de celebración o Centro Cívico de Romaño e Vista Alegre durante a primeira fin de semana de festas.
Pola súa banda, o barrio de Vite ten cita co Serán de Hip Hop, Galeras acollerá a Feira na eira con actividades para toda a familia e o VI Certame de Folk con Leilía, Tiruleque e Óscar Ibáñez ocuparán a Praza da Quintana.
TRABALLOS CONXUNTOS. A aposta deste ano supón un "gran esforzo" de case 658.000 euros de orzamento, asegurou a concelleira Acción Cultural, e engadiu que se trata dunha proposta "moi variada" con artistas "populares" e "alternativas máis minoritarias".
O traballo colaborativo tamén ten espazo nas Festas do Apóstolo, o exemplo que deu Novoneyra é o concerto conxunto da Real Filharmonía de Galicia e Sumrrá, do que destacou que esta actuación permite escoitar á filarmónica galega dúas veces, xa que tamén tocarán antes de comecen as xornadas de Folclore Galego o día 28.
As orquestras e os concertos farán soar á cidade compostelá desde o día 18, despois do pregón da actriz Nerea Barros, e non pararán ata o 31 de xullo, cando Rosalía clausure a rolda de música que será gratis para todos os asistentes, como o resto de actividades.
