Paixón e entrega é o que transmite Luz Casal nos seus concertos e o que ten intención de seguir transmitindo porque, segundo dixo a Efe, cos anos cada vez lle pesa máis a responsabilidade e sae ao escenario "como se fora a primeira e a última vez". O público de Barcelona poderá comprobalo o vindeiro venres, no concerto que ofrecerá a galega no Gran Teatro do Liceo, dentro do Suite Festival BCN Music Experience.
Un recital que forma parte da xira de presentación do seu último disco Almas gemelas, pero no que tamén repasará algúns dos éxitos da súa longa carreira, que empezou co rock e logo virou cara ás baladas e os boleros, sempre buscando novos sons. "Sempre intento ir máis aló -dixo-. Busco ampliar a tesitura, probo a ver se podo falar dun sentimento determinado dun xeito novo, e esa procura axúdame a manter a ilusión". Manter a ilusión é básico para seguir conectando co público pero, para Luz Casal, "a regra número un, a básica, a máis importante, é saír ao escenario como se fora a primeira e a última vez".
Con esta filosofía logrou encher auditorios en lugares tan afastados como China e México, ademais de conquistar aos nosos veciños de Francia, país onde ten previstas doce actuacións nos próximos meses. A intérprete adapta o repertorio en cada concerto porque quere "darlle ao público algo diferente cada vez" e hai lugares onde actúa a miúdo e outros onde hai máis tempo que non recala.
En Barcelona, interpretará "medio en catalán medio en castelán" o tema Boig per tu, que o seu público catalán "sempre pide" e que a ela lle encanta. Unha canción de Sau que tamén namorou a outras voces internacionais, como Shakira, que incluíu a súa propia versión no último disco.
No Liceo, Luz Casal tamén cantará "seis ou sete temas" do seu último álbum, porque ten ganas "de ensinar o neno novo", non só ao que "xa está medradiño". Un traballo que algúns cualificaron como o máis optimista da súa última etapa aínda que, na súa opinión, todos os seus discos son "esperanzadores, incluso os máis desgarrados".
Casal defínese como "unha persoa optimista", incluso cando canta No aguanto más, porque "pon punto final a algo" e "dá esperanza". No entanto, recoñeceu que o seu anterior álbum, Vida tóxica, era máis negro que estas Almas gemelas, porque "estaba noutro momento persoal" e "os discos son un reflexo do teu estado de ánimo". Almas gemelas é froito do "bo momento" que Luz Casal está a pasar e que, na súa opinión, tamén se está reflectindo nos concertos, porque desde 2011 ata hoxe está de sorte e está a ofrecer uns concertos "moi bos", dos que sae "co ego tan grande" que non cabe "pola porta".
Concertos en lugares afastados onde "ten mérito conectar" porque Luz Casal non canta en inglés, como adoitan facer os intérpretes que teñen unha carreira internacional. "Recoñezo que é unha extravagancia -sinalou-, como antes, cando me negaba a cantar boleros, pero é que non me apetece, cando me apeteza fareino. Eu son así". "Esta profesión miña é como unha montaña rusa onde custa moito manter a ilusión, e para manter a ilusión hai que ser un mesmo", concluíu.
Luz Casal: "Saio ao escenario como se fora a primeira e a última vez"
A cantante asegura que cos anos cada vez lle pesa máis a responsabilidade
