Jorreto apela a respectar a natureza ao ingresar na Academia de Belas Artes

García Braña louvou a "alta calidade" da súa obra e a influencia que exerceu na formación da "moderna tradición arquitectónica galega"

Manuel Gallego Jorreto. EFE
photo_camera Manuel Gallego Jorreto. EFE

O arquitecto Manuel Gallego Jorreto (O Carballiño, 1936) ingresou este sábado como novo académico de honra da Real Academia Galega de Belas Artes cun discurso no que abordou a importancia do respecto á natureza na construción dun novo medio urbano.

No seu discurso ‘Sobre as relacións entre a arquitectura e a natureza’, o Nacional de Arquitectura realizou un percorrido pola historia arquitectónica até a actualidade, onde "aparece unha visión cada vez máis unitaria das disciplinas de arquitectura, o urbanismo e a paisaxe".

No Museo de Belas Artes da Coruña, que el mesmo deseñou, Gallego Jorreto reflexionou sobre as "conexións" e fluidez do espazo arquitectónico interior co espazo natural exterior a través dun repaso polo movemento moderno, a posmodernidade e a globalización.

Celestino García Braña, destacou a obra creada por Gallego Jorreto por "a súa alta calidade" e "a súa influencia"

 Aquí lembrou que a Xeración Nós xa nomeou esa disposición ante a natureza coa palabra ‘terra’, coa que expresar os lazos que unen aos habitantes con ela, posto que o arquitecto considera que cada cultura percibe dunha forma diferente á natureza.

Pola súa banda, o vicepresidente da Real Academia Galega de Belas Artes, Celestino García Braña, destacou a obra creada por Gallego Jorreto por "a súa alta calidade" e "a influencia que tivo na formación da moderna tradición arquitectónica galega". 

No seu discurso puxo o foco tamén sobre a arquitectura popular rural, moi importante en Galicia e de gran valor por achegarse á arquitectura como creación. Neste caso, argumentou que o ser humano modificou o espazo natural porque o necesitaba para vivir. "Aquí a relación entre artificio e natureza é de igualdade. As arquitecturas convértense en instrumentos para desenvolver a vida, constrúese no medio natural, transformando o territorio pero sen destruílo e sen ningunha preocupación estética", sostén.

Doutor en Arquitectura, Manuel Gallego Jorreto desempeñou durante máis de dúas décadas o papel de profesor na Universidade da Coruña e é recoñecido por edificios como o Mercado de Santa Lucía da Coruña, o Museo das Peregrinacións de Santiago ou o complexo presidencial da Xunta en Monte Pío, onde reside o xefe do Executivo galego. Do mesmo xeito, foi membro fundador do Museo do Pobo Galego en 1976 e formou parte do Seminario de Estudos Galegos.

Comentarios