O historiador Xosé Manoel Núñez Seixas fíxose, coa obra De imperios e danzas: poéticas da pluralidade territorial no fascismo español (1930-1975), co Premio Ramón Piñeiro de Ensaio 2020.
O galardón, que o convocan conxuntamente a Xunta e a Editorial Galaxia co apoio de Caixa Rural Galega, está dotado con 3.000 euros e coa publicación da obra pola dita editorial. O xurado, que concedeu o premio por maioría, destacou a calidade e variedade temática dos orixinais presentados, así como a capacidade analítica do traballo seleccionado.
A obra gañadora presenta, cun estilo diáfano e crítico, o fenómeno da utilización do folclore e dos seus símbolos por parte do fascismo e faino baseándose nunha rigorosa documentación e aplicando un enfoque contrastivo entre as diferentes nacionalidades históricas. Ademais, destaca a actualidade do tema ao vincular os feitos históricos que trata co presente.
O autor, Xosé Manoel Núñez Seixas (Ourense, 1966), é licenciado en Historia pola Universidade de Santiago de Compostela e doutor en Historia Contemporánea polo Instituto Universitario Europeo de Florencia. É catedrático da Universidade de Santiago de Compostela, vicepresidente do Consello da Cultura Galega e autor de numerosos artigos e manuais. As súas investigacións céntranse na análise comparada dos nacionalismos, nos estudos migratorios e na historia cultural da guerra. En 2019 foi Premio Nacional de Ensaio.
