O exalcalde do Grove José Alfredo Bea Gondar, autor da demanda pola que unha xuíza mantén secuestrado o libro Fariña, quere agora impedir a súa distribución e venda en Portugal e acusa ao seu autor, Nacho Carretero, e aos seus editores de incorrer en delito de desobediencia.
Así consta nun escrito, ao que tivo acceso Efe, que presentou este mércores o avogado de Bea Gondar no Xulgado de Instrución número 7 de Collado Villalba, cuxa titular Alejandra Fontana decidiu o secuestro cautelar do libro sobre o narcotráfico galego ata que se resolva o fondo da demanda presentada por Bea Gondar.
O exalcalde do Grove aparece mencionado en dúas ocasións na obra polos seus supostos vínculos co narcotráfico, uns feitos que foron confirmados pola Audiencia Nacional, aínda que o Tribunal Supremo revogou esa sentenza por un defecto de forma.
Agora, intenta frear a venda dos libros en Portugal, que comezou a pasada semana, aínda que o contrato de venda de dereitos, como comprobou Efe, asinouse en outubro de 2017, meses antes da decisión xudicial.
O contrato asinárono os responsables de Libros do KO, editora de Fariña, coa editorial Saída de Emergência, o 4 de outubro e este xoves será presentado no xulgado, indicaron a Efe fontes da editorial. A cuestión é que Bea Gondar non só pide a paralización da venda do libro, senón que a xuíza dea traslado dos feitos ao fiscal por se os mesmos fosen constitutivos de delito de desobediencia (castigado con penas de ata un ano de prisión).
O libro, que vai pola décima edición, leva secuestrado desde marzo por decisión da xuíza Fontana a partir da demanda de Bea Gondar, quen reclama unha indemnización de 500.000 euros por unha suposta vulneración do seu dereito á honra.
A obra non se poderá editar nin vender en España ata que se resolva o fondo do asunto a non ser que a Audiencia Provincial de Madrid se pronuncie antes sobre o recurso presentado polos editores contra o secuestro.
