Iván Ferreiro publicará o 21 de setembro novo disco, Cena recalentada, que constituirá unha homenaxe á mítica formación galega Golpes Bajos, tal e como confirmou este mércores a súa discográfica.
Non é a primeira vez que o intérprete de Años 80 rende tributo aos seus paisanos, pois xa en 2014 ofreceu un concerto monográfico no que versionou, entre outros, o tema que dá nome ao seu popular álbum Lágrimas.
Tal e como informaba hai unhas semanas o portal Efe Eme, este traballo conta coa colaboración de antigos membros de Golpes Bajos, como Teo Cardalda, Luís García ou Pablo Novoa, acompañante habitual de Ferreiro desde hai tempo.
Cena recalentada será o oitavo disco en solitario para o exintegrante dos Piratas e sucederá no mercado a Casa, publicado en 2016 e finalista ao mellor disco español dese ano pola prensa especializada que votou o Premio Ruído.
