David Murray puido facer unha vez máis este mércores o que máis lle gusta: tocar jazz ante o público. "En realidade o entusiasmo lévame. Son moi feliz no escenario, é algo moi natural para min. Nunca me dá medo", comentaba nunha entrevista.
A súa preocupación é manter ese entusiasmo contra o desgaste emocional dos anos. "Cando non tocas diante de xente tes que animarte a ti mesmo. Cando estou a ensaiar en casa póñome discos de intérpretes e cancións que me gustan e toco con eles para que me animen", engadía.
O escenario desde o que mostrou este mércores todo o seu saber foi o 1906 do Círculo das Artes de Lugo, pero Murray leva subido a tarimas desde que era un neno. A súa nai era organista profesional de oficio eclesiástico na cidade norteamericana de Oakland, onde o músico naceu en 1955. A familia era unha banda, na que tanto o pai como os seus irmáns interpretaban con instrumentos de modo afeccionado.
O saxofonista é coñecido polo seu ecleticismo, pero, nun plano remoto, hai unha influencia africana porque a súa confesión, a Igrexa Pentecostal de Estados Unidos, "mantén os ritos que levaron os escravos". David Murray achega o seu entusiasmo.
BOSSO. O escenario principal do certame, o 1906, acolle ás 20.30 horas deste xoves ao trompetista Fabrizio Bosso, un membro destacado da escena italiana. Actuará en formación de quinteto, co saxo tenor Max Ionata.
O Clavicémbalo será o espazo no que toque o trompetista Natanael Ramos ás 23.00 horas. O pase de I called him Morgan no Ho! Gruf, ás 18.00, pecha o programa do festival para este xoves.
