O Festival de Cine de Ourense de 2020 arrincou este venres con dous nomes propios: o do cineasta monfortino, Dani da Torre, que recolleu o premio Ourense á súa traxectoria, e o do modisto Adolfo Domínguez, que recibiu o premio dos 25 anos do certame, durante o transcurso dunha gala inaugural que se celebrou seguindo estritas medidas que marcan os protocolos polo coronavirus.
O director, autor de obras como El desconocido ou La sombra de la ley, recibiu o premio Ourense, que o certame outorga a aqueles profesionais que destacaron nalgunha faceta do ámbito audiovisual.
Con este premio, o Festival de Cine valora a súa traxectoria vinculada tamén a Ourense, onde rodou algunhas escenas de Live is life, un proxecto que suporá a súa volta á gran pantalla tras a estrea da serie A Unidade.
Pola súa banda, Tiziana Domínguez, filla pequena de Adolfo Domínguez e directora creativa do grupo, foi a encargada de recoller o galardón concedido ao deseñador, xa retirado, Adolfo Domínguez, o premio Calpurnia polo 25 aniversario do festival de Cine de Ourense.
Nun vídeo que se proxectou na gala, Adolfo Domínguez, produtor de La moños, película coa que se abriu a primeira edición do Festival de Cine en 1996, fixo un repaso por este festival, que naceu fai 25 anos "cando aínda era semente. Só duran as cousas que serven á comunidade. Eloy Lozano e os que seguistes facéndoo, algo fariades ben", foron as súas palabras.
Durante a gala, o director artístico Miguel Ánxo Fernández aproveitou para lanzar unha mensaxe de que a cultura é segura, tamén nesta edición que "non só resiste á situación sanitaria" senón que dá "un paso adiante" para converterse en todo "un referente do audiovisual galego" e como "espazo aberto ao diálogo".
Nesta liña, lanzou unha mensaxe de apoio a todos os profesionais que forman parte do sector audiovisual nestes tempos "tan difíciles para todos e en especial para eles", coa cultura como "un sector estratéxico" neste país.
O festival de cine arrinca esta noite coa proxección da curtametraxe Amanezca, de Lucía Álvarez, rodada por mulleres, e que dará paso á proxección da película Olvido y León, do director de cine, Xavier Bermúdez, nunha edición marcada polas medidas covid, con aforamento limitado e as pertinentes medidas de seguridade.
En total, a cidade acollerá ata o próximo 3 de outubro 91 proxeccións de case unha vintena de países, con dez películas en sección oficial e actos de homenaxe a personalidades, como Fellini ou Ennio Morricone.
