Hai oito anos decidiu investigar os crimes de Galicia que quedaran no esquecemento. Este ano chegou o resultado: Ilustres asasinos e distinguidos cadáveres. O xornalista José de Cora presentou este xoves na Coruña o seu último libro, cheo de asasinatos que implican a personaxes ilustres como Castelao, Rosalía de Castro ou Emilia Pardo Bazán.
"Matar estaba á orde do día", asegura De Cora. No seu libro recolle 25 ou 30 casos, aínda que para el, o máis macabro foi o cometido por un lucense en Madrid: "Era xardineiro dos Medinaceli". "Chamábase Miguel Fonteboa" e, aínda que traballaba para esta familia, facía pequenos traballos fóra. "Criaba flores a unha moza afeccionada ás plantas", conta De Cora. Un día, cando ela volvía do teatro, non recordaba que quedara con Miguel "para coidar as plantas". El chamou á súa porta e atopouna semidesnuda. "Miguel emocionouse ao vela e produciuse un crime que fai a de deus. Córtalle todo", conta. Aos tres días, "matárono".
Cada caso relatado en Ilustres asasinos e distinguidos cadáveres é diferente, aínda que se hai un asasinato co que queda o xornalista "sempre" será o que incumbe a Rosalía de Castro.
Nieves Hermida, curmá da poeta, era "preciosa". Tiña unha "voz moi linda". Trasladouse de Santiago a Madrid para estudar no conservatorio, conta De Cora. Pero crúzaselle un inspector de Policía, Pedro Coll. "Namórase da rapariga. ela deixa a carreira e casan", revela. Ocorreu sobre 1910. A Nieves gustáballe picotear cuns e outros". Ata o marido o consentía e incluso cobraban por iso: "Un caso de prostitución en altas esferas". Un dos amantes é amigo de Coll e concelleiro en Madrid. Coll mata ao seu amigo, pero absólveno. Unha noiteboa encérrase no baño e pégase un tiro.
O catedrático de Literatura José María Paz Gago recoñeceu que non era partidario de que un libro de crimes levara o premio Arenas, como foi o caso. "A medida que o lía, enganchoume".
