Ten 22 anos, pero un mundo interior tan rico que abonda escoitala un momento para quedar encandeado cos segredos do proxecto no que estivo traballando durante os últimos 36 meses: Street View Compostela, unha nova —e orixinal— forma de facer arte a partir deses instantes cotiáns que deixou conxelados para sempre a cámara de Google Maps ao seu paso pola periferia de Santiago.
"As imaxes están cheas dunha espontaneidade e unha naturalidade espectacular, porque os seus protagonistas non senten a presión da cámara, non posan", explica Sara Giunta, autora do proxecto, que soubo atopar o lado artístico a unha ferramenta feita para navegar de forma virtual polo mundo.
As imaxes mostran escenas cotiás dos habitantes da periferia de Santiago e retratan a vida rural galega
"Quería apropiarme de algo que non era meu para construír unha nova obra desde o meu punto de vista; esa é a miña contribución", comenta fronte ás vinte capturas realizadas a través do Street View de Google: unha muller que tende un par de sabas nun prado, dous nenos que xogan na rúa, un home que espera xunto á fiestra dunha casa anónima.
Giunta percorreu palmo a palmo, desde a pantalla do seu computador, os pequenos camiños que rodean a capital galega e conectan a cidade co campo para rescatar aquelas imaxes que "capturan a esencia da vida".
A frescura das escenas atrapa o espectador, que logo repara noutras cousas, como o mérito da composición ou a coidadosa selección dos ángulos e os instantes escollidos.
Todo o mundo pode facer unha captura en Google Maps, o difícil é facer unha verdadeira "revisión estética" do material, compoñer unha mostra con imaxes "vivas" sobre a cotiandade da sociedade rural galega.
"Sempre me interesou a periferia, quizais porque nunca vivín nunha aldea e iso fíxome idealizar a vida rural", confesa Giunta, estudante de Historia da arte, que asegura ser unha amante empedernida da cultura tradicional galega.
O proxecto, que tamén pode seguirse en Instagram a través de @