Celanova homenaxea a Celso Emilio

O cemiterio de San Breixo, en celanova, será o encargado de acoller un acto en honra do poeta Celso Emilio Ferreiro que se celebrará ao longo desta mañá. A homenaxe está organizada pola Fundación que leva o nome do escritor, o Colectivo Arraianos e as Redes Escarlata.

O acto principiará ás 11 da mañá, coa presentación da nova entrega da Revista Arraianos, o número especial 'Arraianos VIII-Vivir na Raia', co que dita publicación pecha un ciclo que empezaba hai seis anos, tal día coma hoxe, no mesmo espazo simbólico, ao pé do xacigo de Celso Emilio Ferreiro.

A continuación haberá un recital poético e musical onde van intervir destacados poetas das Redes Escarlata, como Anxo Angueira ou Xosé Luís Méndez Ferrín, e músicos como MC García, de Dios Ke Te Crew ou Leo e Arremecághona, dos Labregos no tempo dos Sputniks, que interpretarán cancións con letras de Celso Emilio en clave contemporánea. Pechará este acto o gaiteiro de Lobeira, Daniel Romero cos seus sons telúricos e arraianos.

Os poetas das Redes Escarlata darán o punto a estes actos de homenaxe cunha acción performance que se desenvolverá a continuación, chamada Acción Ferreiro, percorrendo algunhas rúas e prazas da vila natal do autor de 'Longa noite de pedra'.

Comentarios