LUGO. A galería A Catedral de Lugo, a sede que se sitúa na rúa Bispo Basulto, 12, acolle desde onte a mostra Artistas pontevedreses que reúne unha colección de pintura e escultura de creadores como Laxeiro, Jorge Castillo, Leopoldo Nóvoa, Arturo Souto, Alfonso Sucasas, Lugrís Vadillo, Manolo Paz, Barreiro, Mercedes Ruibal ou Francisco Pazos. Gran parte da mostra ocúpana as pezas de Jorge Castillo, un dos grandes mestres da pintura contemporánea europea da segunda metade do século XX, e un dos artistas galegos máis internacionais.
Na Catedral pódense contemplar pezas que datan desde o ano 1975 ata obras realizadas fai uns catro anos. Todas elas son mostra do seu imaxinario, cunha iconografía moi reconocible con motivos como o home bota, os lagartos ou os paxaros.
Outro dos grandes protagonistas desta reunión de Artistas de Pontevedra é un dos pintores galegos máis universais de todos os tempos, Laxeiro.
Na mostra lucense pódense admirar, fundamentalmente traballos en papel do que foi un dos renovadores da plástica galega.
O expresionismo, o seu barroquismo en ocasións, o esperpento, a abastracción, a relixiosidade están presentes no seu traballo.
Nesta ocasión proponse un percorrido desde os anos 50 ata os 80.
Con influencias de Laxeiro e tamén de Pérez Bellas xorde a arte de Mercedes Ruibal, a única muller presente nesta colección, aínda que o seu estilo evolucionaría máis tarde cara a un estilo máis persoal, inclasificable, con certos toques naif. Os seus personaxes, cheos de cor e tenrura, aparecen como flotando sobre o fondo.
