Burning, Delorean e Amancio Prada actuarán no Festival da Luz

Unha trintena de artistas participarán en setembro na cuarta edición do Festival da Luz, que este ano será "único", non só por ser benéfico, senón pola mestura de estilos de música que soarán sobre os seus escenarios, da man de Burning, Delorean, Miguel Poveda, Anni B Sweet ou Amancio Prada.

A cantante galega Luz Casal, que dá nome ao festival, presentou este xoves a nova edición, que se celebrará os próximos 12 e 13 de setembro, da que destacou que é "única" e coa vocación de "ser solidaria, benéfica e musical, con estilos que son un expoñente do que hai na música no noso país".

Tras expresar o seu compromiso coa música galega e tamén de fóra da comunidade, Luz explicou que xa confirmaron a súa asistencia case a metade dos grupos que acudirán a este festival, entre os que ademais se atopan María del Mar Bonet, Manos de Topo, Emilio Rúa, Eladio y los Seres Queridos, Riff Raff e Juan Perro.

A recadación deste ano coa venda de entradas, a dez e quince euros cada un dos dous días, irá destinada a Médicos sin Fronteras polo labor que está a facer esta ONG fóra de España.

"Este festival é único, non hai un festival que sexa benéfico e que lle dea un espazo á música, á historia da música deste país como este festival", subliñou a artista.

O cartel deste ano é unha boa mostra diso e caracterízase por ser "diferente" e porque nel mesturaron estilos "sen ningún tipo de pudor, porque sabemos que a música non ten por que estar necesariamente radicalizada".

Os públicos poden ser "amplísimos e cohabitar de xeito extraordinario", opina Luz Casal, e é esta harmonía "unha parte esencial da nosa supervivencia".

O concello coruñés de Boimorto, un espazo eminentemente rural que apenas excede os 2.000 habitantes, acollerá esta cuarta edición con grandes expectativas de público e, sobre todo, de "facer gozar ao público" en dous escenarios, polo que haberá grupos que toquen á vez.

A cita será na aldea de Orros, onde naceu Luz Casal, unha terra situada no triángulo das Bermudas galego, xa que conflúe entre Santiago, A Coruña e Lugo, e este ano ampliará o espazo dedicado ao público infantil cunha zona de mais de 5.000 metros cadrados.

A entrega de todo o equipo que organiza este festival, así como o seu "coñecemento, experiencia, traballo e ilusión non sería nada" sen os músicos, os patrocinadores e o público, asegurou Luz.

"Empezo polos músicos -continuou-, porque pasaron polas anteriores edicións nomes importantes que fixeron un esforzo considerable en todos os casos, e grazas ao seu talento farannos nesta edición ter unha perspectiva musical grande e darnos satisfacción, que é do que se trata".

En segundo lugar, destacou o labor dos patrocinadores que apoian esta cita, entre outros o Concello de Boimorto, Gadisa ou o Banco Sabadell Gallego.

A terceira forza do festival está no público, un público que Luz considerou moi "fiel" porque contan con el sen saber os nomes dos grupos e cantantes que conformarán o cartel.

A delegada en Galicia de Médicos Sin Fronteras, entidade á que se destinarán os beneficios desta edición, María Díaz, expresou o agradecemento en nome da ONG, porque "é un orgullo e un premio" merecer esta colaboración, que permitirá "seguir dando asistencia sanitaria independente a millóns de persoas" e "dar voz ás persoas que non a teñen".