"A identidade non é algo que se poida comprar nas farmacias. A identidade constrúese e destrúese sistematicamente. En Galicia, a construción da nación-cultura foi obra dos intelectuais e, aínda que a Igrexa non foi belicosa coa lingua galega até o Vaticano II, si tivo un papel esencial nesa destrución sistemática".
Con estas palabras sobre a identidade galega arrincou este martes, na sede Afundación de Lugo, o historiador Ramón Villares a presentación do seu novo libro, Galicia, una nación entre dos mundos, nun acto dentro dos Encontros en El Progreso que contou coa presenza do exdirector do xornal Lois Caeiro, e a periodista Lourdes Abuide.
Villares defendeu que o seu novo traballo "non é un libro definitivo, pero si o resultado de moitos anos de reflexións para tratar de facer visible e presentarnos cara fóra dun modo intelixible".
O historiador explicou que o seu novo ensaio está concibido "para lectores galegos e non galegos a través dunha introdución sintética, que non escolástica, do que é Galicia".
Lois Caeiro: "Ramón Villares é unha figura na nación, un dos referentes que noutra época sería un patriarca da cultura"
Segundo Villares, Galicia ten que "loitar contra os estereotipos que non son verdade", e en Galicia, una nación entre dos mundos o autor trata de facer "unha revisión da historia do nacionalismo dende un punto de vista cultural, para presentar o proceso de construción desta identidade nación-cultura".
Engadiu que na súa obra non existe a "ortodoxia, é un proceso que non trata de convencer a ninguén de ningunha verdade". Malia todo, destacou a Igrexia "institución, non relixión", como o gran elemento decisivo en Galicia porque "durante máis de 1.000 anos gobernou mentes, almas e ata aspectos patrimoniais dos galegos".
O historiador sinalou que "ningunha institución" preservou a lingua galega. "Nin a Igrexa, que era castelanfalante salvo na súa executoria local, porque aí falaba en galego".
Villares tamén comparou o movemento agrarista que houbo en Galicia a comezos do século XX co que se viviu en Irlanda, "e que en Irlanda desenvolveu nun partido político de corte autonomista". O historiador lembrou que mentres que no país irlandés "a translación do movemento social á política foi unha realidade, en Galicia faltou converxencia".
Lourdes Abuide: "É unha obra moi necesaria pola importancia da identidade, un tema do que se fala moito hoxe en día"
Por último, o autor de "Galicia, una nación entre dos mundos" explicou que eses "dous mundos" son Europa e América. "Galicia ten unha fonda raíz europea, é unha sociedade conectada co centro europeo", concluíu.
O exdirector de El Progreso, Lois Caeiro, abriu o faladoiro destacando a figura de Villares, a quen nombrou "figura da nación" e "un dos poucos referentes que noutras épocas sería considerado un patriarca da nosa cultura".
Caeiro sinalou a nova obra de Villares como un "cambio de enfoque para entender Galicia" e como "unha oportunidade dunha realidade nova entre o nacionalismo político e as diferentes culturas".
O exdirector de El Progreso tamén desexou que o libro "marque o discurso do nacionalismo" porque "rompe mitos: os castelos vencen aos castros".
A periodista Lourdes Abuide sinalou a "necesidade" da nova obra de Ramón Villares e fixo unha reflexión sobre "a importancia da identidade, un tema que hoxe en día está moi en boga". A periodista lembrou que Galicia "é Galicia polo que aporta a América a través da emigración" e pola cultura, "pola xeración Nós, polas Irmandades da Fala, que puxeron o primeiro chanzo para crear identidade en Galicia".