O que arde, a flamante película de Oliver Laxe, chegará este venres ás salas de cine logo de ser aclamada pola crítica e os xurados nos máis importantes festivais de cine nacionais e internacionais.
A última cinta do cineasta proxéctase desde este venres en 49 salas españolas, incluídas 19 galegas situadas nas sete principais cidades –Santiago, A Coruña, Vigo, Ourense, Lugo, Pontevedra e Ferrol– e en pequenas localidades como Carballo, Monforte de Lemos, Vilagarcía de Arousa, Viveiro, A Rúa, Verín, As Pontes, A Estrada e Caldas de Reis. En Ribadeo ofrecerase un pase único o vindeiro xoves 17 a partir das 20.30 horas. A película de Laxe proxectarase en versión orixinal en galego, con opción de subtitulado en castelán e en catalán.
O que arde recibiu o premio do xurado da sección oficial Un Certain Regard do Festival de Cannes, onde fixo historia ao ser a primeira película en versión orixinal en galego que se proxectou no certame francés.
Ademais, a cinta recibiu o IX Premio San Sebastián Filme Commision do Festival de San Sebastián, que recoñece aquelas películas que mellor reflicten os valores urbanísticos, naturais, culturais ou sociais do lugar onde foron rodadas. O último dos premios concedidos a O que arde foi o Premio Especial do Xurado no Ourense Filme Festival celebrado a comezos deste mesmo mes.
Oliver Laxe fará unha xira galega para presentar a película e estará tamén en Santiago, A Coruña, Ferrol, Vigo e Pontevedra
LAXE, PRESENTE. Oliver Laxe acompañará a película na súa xira galega e ofrecerá coloquios en diferentes salas. A primeira quenda chegará este venres no Cinema Numax de Santiago, e contará tamén coa participación dos dous protagonistas, Benedicta Sánchez e Amador Arias.
O segundo dos coloquios será o vindeiro luns en Cantóns Cines (A Coruña), en compañía do poeta Yolanda Castaño e a partir das 20.30 horas.
O martes será a quenda dos Cines Dúplex de Ferrol a partir das 19.45 e o mércores, Oliver Laxe estará en Lugo durante a presentación da película en Códex Cinema (18.00, 20.30 e 22.00 horas). O xoves, Laxe estará en Pontevedra (Cinexpo, 18.00 horas) e en Vigo (Multicines Norte, 21.00 horas), presentando unha película rodada en galego e nos Ancares lucenses.