O anuncio do Friulio 2019 —festa castrexo-romana que se celebra en Friol— elaborado pola produtora lucense 60 Ráfagas, logrou o premio ao mellor anuncio publicitario do American Golden Picture International Filme Festival de Jacksonville en Florida (EE UU).
Este prestixioso certame recoñece así o traballo da empresa audiovisual posta en marcha por Gloria Tejero e Daniel Díaz.
Friulio - Nos dejamos la piel para ti from 60ráfagas on Vimeo.
"Este premio implica un gran recoñecemento do traballo que facemos, estamos moi satisfeitos porque nos anima a seguir traballando na mesma liña. Ademais, a nivel comercial é moi positivo porque dá publicidade da nosa empresa e é unha forma de avalar o traballo ben feito", explica Daniel Díaz.
O anuncio, no que participaron unha decena de persoas no equipo técnico e máis de medio centenar de figurantes, é finalista ademais no festival TIFF da India.
"Cando nos encargaron este anuncio déronnos liberdade creativa para facelo e rodámolo en dous días. A nosa idea era que narrativamente discorrese en dous tempos: nun presente onde ten lugar unha batalla e imos facendo flashbacks a un campamento castrexo onde están a prepararse para a batalla e estanse despedindo da xente que se supón que non van volver a ver. O Friulio é un encontro entre castrexos e romanos e quixemos desmarcarnos dos clásicos anuncios de festas de recreacións históricas facendo un minitrailer de xénero", comenta o produtor, quen indica que durante a rodaxe contaron ademais coa colaboración das asociacións A Castronela e Cohors Lucensium.
É marabilloso que nos concedan este tipo de recoñecementos, son un indicativo de que o noso traballo traspasa fronteiras
"Puxeron moito da súa parte para recrear as batallas bélicas e quedamos moi satisfeitos co resultado", engade o mozo, quen se mostra moi satisfeito co recoñecemento internacional do seu traballo.
"É marabilloso que nos concedan este tipo de recoñecementos pois son un indicativo de que narrativamente e tecnicamente os traballos que facemos traspasan fronteiras e gustan máis aló do cerco no que vivimos. Estamos moi contentos", recalca.
A firma audiovisual 60 Ráfagas, que naceu en Lugo hai un lustro, foi recoñecida nos últimos anos por varias das súas producións. O pasado ano estivo nomeada os premios Mestre Mateo e na actualidade compiten cun videoclip musical no Prisma Awards de Roma. "Todos os galardóns son un aliciente máis para seguir traballando no que nos gusta", conclúe Díaz.
