Familiares e amigos do recoñecido artista lucense Alfredo Labajjo Grandío inauguran este mediodía na galería Nova Rúa Arte de Lugo unha exposición con preto de 40 obras pictóricas do autor, falecido o pasado ano na súa vivenda de Friol.
A mostra pretende ser unha homenaxe a este artista e un recoñecemento á súa traxectoria. Estará aberta ao público na galería de arte lucense ata o
Labajjo Grandío, nacido en Lugo en 1939, foi un pintor único, creador dunha obra que reflicte á perfección a forza dunha personalidade indómita.
Influenciado polas vangardas de principios de século pasado (chegou a coñecer persoalmente a Pablo Picasso durante unha etapa na que viaxou por toda Europa), desenvolveu unha figuración con tinguiduras de primitivismo e incluso con toques de fauvismo, en especial no uso da cor.
Os seus cadros son de trazo groso e volumes rotundos, cunha temática moi pegada á terra e o mundo rural.
Curmán do tamén artista Tino Grandío, educouse artisticamente na súa maior parte en Madrid, onde se trasladou o seu pai, catedrático, por un problema asmático para seguir dando clases. En realidade, estudou para enxeñeiro técnico industrial, pero pouco despois de acabar a carreira decidiu dedicarse por completo á arte.
Ao seu regreso a Lugo, estivo tres anos visitando Os Ancares, onde vivía na súa tenda de campaña, para pintar as súas paisaxes. Tamén cultivou a amizade de Uxío Novoneyra, que o guiou polo Courel.
Unha das súas últimas exposicións foi na Casa de Galicia de Madrid. Pola súa traxectoria e a súa obra, Labajjo Grandío recibiu o alcume do Picasso galego.