O Festival de Cans seleccionou nove curtametraxes que exploran variantes do documental e do cine experimental para proxectalos o día 25 de maio no marco da competición de non-ficción FuraCans. Entre as seleccionadas figura 'Caerán lóstregos do ceo' (2018) de Adrián Canoura.
Neste traballo, o director burelense conta que, para a sociedade tradicional -esencialmente para a rural- o trono é un dos peores males. "Atribúeselle ao Maligno e asóciase co demo. Mística e natureza. Un fenómeno que cabalga entre mito e realidade. O abstracto, o intanxible, o incomprensible. O que xa é previamente e somos incapaces de definir por alusivo. Existe ou non existe?", indica.
Canoura sinala que a súa peza está inspirada nos traballos de Vicente "Risco sobre o paso do paganismo ao cristianismo, mostrando as causas". Para realizalo desenvolveu unha investigación en bibliotecas, á que engadiu "poemas de Rosalía relacionados co tema".
Os lugares de rodaxe foron "os montes de Viveiro e Burela, e o lugar de Vilelos no Saviñao, entre outros". O seu interese por este tema procede de que me interesa a relación do home co medio", que ten a súa orixe en que se criou "entre a terra e o mar".
'Caerán lóstregos do ceo' proxectouse no festival internacional de cine Filmadrid, onde obtivo os premios a mellor película de vangardas e o Camira, e no certame de curtametraxes portugués de Vila do Conde.
ENTRADAS. As entradas para FuraCans están dispoñibles desde este martes a un prezo de 6 euros na páxina web do festival. O aforamento será limitado, xa que só poderán asistir 180 persoas ao pase matinal e 90 ao de tarde.
En concreto, proxectarase 'Hora silenciosa', de Noelia Muíño; así como a obra de Brandán Cerviño 'Na boca da mina', gravada na antiga cidade mineira de El Cobre, en Cuba. Tamén se presentarán '16-11-2016/13-5-2017', de Marta Valverde, e 'Devalar', no que Mar García retrata a súa aldea. 'Cando mamá pechou as caixas' de Arancha Brandón.
Ademais, 'Palmira' de Rebeca Lar; mentres que 'In touch with the infinite', de Alejandra Pombo. FuraCans tamén proxectará dúas pezas experimentais en canto ás imaxes e os sons, a de Adrián Canoura e 'Como desaparecer', de Carlos Martínez Peñalvar.
Toucedo
Diana Toucedo adiantará contidos da súa adaptación da obra 'A leituga' e Álvaro Gago da súa primeira longametraxe, 'Algo parecido á felicidade'.
