A Consellería de Política Social oferta este ano un total de 1.514 prazas para a trintena de campamentos xuvenís de verán que se desenvolverán en sete centros da provincia entre os meses de xullo e setembro.
As prazas ofertadas redúcense de forma notable con relación a anos anteriores debido ás limitacións do aforamento establecido polas autoridades sanitarias a causa do Covid-19, aínda que, segundo explican desde a Xunta, amplíase a oferta de propostas.
Estes campamentos de verán organizaranse en grupos de ata 15 participantes, co que se garantirá a distancia interpersoal entre participantes e equipo técnico. Tamén se reforzarán, ademais, as medidas hixiénico sanitarias de carácter persoal e das propias instalacións. O prazo de solicitude para inscribirse xa está aberto e prolongarase durante os próximos seis días hábiles.
No caso da provincia esta trintena de campamentos desenvolveranse nas instalacións de Viveiro, Ribadeo, Portomarín, Pas, Carballedo, Quiroga e Lugo.
A oferta completa de campamentos da Xunta no conxunto de Galicia ascende a un total de 6.872 prazas
Unha das principais novidades en canto a propostas é o campamento AYCH Tecnolóxico que terá lugar no Lug2 e que contará con tres edicións. Estas mesmas instalacións albergarán tamén outros dous quendas do campamento artístico titulado O Musical.
O albergue xuvenil de Area, en Viveiro, oferta outros catro campamentos sobre Ambiente Mariño e Náutica.
A Miña Primeira Aventura é o título que engloba as actividades que se desenvolverán nos cinco campamentos que levarán a cabo no albergue Benigno Quiroga de Portomarín e que están destinadas a nenos de nove anos.
Na Devesa (Ribadeo) ofrécense tres propostas diferentes agrupadas en Multiaventura: Ambiente e Mar, Acampada ao Carón do Mar e Endevésate co Mar.
As instalacións de O Chacotes en Palas de Rei acollerán dúas edicións da Aventura-T e outras dúas do Multiaventura nos Chacotes; mentres que en Carballedo desenvolveranse catro quendas do Adventure Camp. Pola súa banda, no albergue municipal de Quiroga terán lugar outras dúas edicións do Explora O Courel.
A oferta completa de campamentos da Xunta no conxunto de Galicia ascende a un total de 6.872 prazas. Para coñecer as distintas propostas na súa totalidade pódese consultar a web www.xuventude.net